鄭裕玲死撐冇抄襲
無綫自家製歌唱節目《星夢傳奇》被指抄襲內地歌唱節目《我是歌手》，身為《星》主持鄭裕玲認為要迎合觀眾口味：「我哋全部都係自己人，冇話抄唔抄嘅，全世界都興緊呢啲歌唱節目，觀眾鍾意睇呢啲半真人騷！（你又唱？）我唱得就做咗歌手啦！」而另一主持崔建邦亦稱不會加入鬥唱：「做主持好啲，有騷錢！」
至於監製麥鎮東則否認抄襲，同時更指評判狠批是個人觀點而非為吸收視：「歌唱比賽就係淘汰o架啦！《我》都係抄澳洲嘅同類節目，我哋係度咗橋先睇番《我》參考，一定有嘢差唔多！（評判狠批是無綫gimmick？）點敢要求評判講嘢，佢哋咁有年資，更唔係演員，呢個係比賽，有point咪接受囉！（會安排歌手參加？）睇反應，可能會。」而參賽者袁偉豪亦不覺抄襲：「香港未有呢類節目，可以畀觀眾睇到藝人另一面。」
鄭俊弘先sing奪人
在首集《星夢傳奇》憑174.9分首名出線的鄭俊弘，獻唱《時代曲》時表現平地一聲雷，評判巫啟賢稱給予80分外，更獲郭偉亮勸他轉行歌手。原來曾參加《2001全球華人新秀歌唱大賽》的鄭俊弘，當年勇奪「突破新秀巨星演繹獎」、「現場最具風采獎」及「網上完美之聲大獎」，戰績彪炳。在無綫十年一直演配角的他說：「我唔會唔做演員，希望做到演員同歌手，入行後第一次有咁嘅機會，今日都緊張到胃痛，希望之後出街會被人叫得出個名。」