張名雅走音喊住走

近期內地歌唱比賽辦得有聲有色，無綫即照辦煮碗自家製一個名為《星夢傳奇》比賽，並號召旗下對唱歌有興趣藝人參與，節目共十集，每次有七位藝人出賽，評判與現場觀眾各佔一半作為評分，即場打分，最低分數兩位被淘汰，接着有兩位新參賽者加入，以同樣方式進行淘汰，而最後兩集將會作現場直播，選出終極冠軍！不過該節目形式被指與內地熱爆的《我是歌手》相似。

前晚無綫派出黃智雯、張名雅、梁烈唯（唯唯）、袁偉豪、羅鈞滿、張景淳及鄭俊弘於電視城錄影第一集，評判團有葉蒨文、巫啟賢、周啟生、郭偉亮（Eric），不過芸芸參賽者當中，並非個個都演而優則唱，大部分更出現走音、失準等情況，黃智雯與張名雅更被批評得體無完膚，認真慘情。

張名雅自知唱功麻麻，即場落淚，崔建邦在旁安慰。

巫啟賢

「似去咗恐懼世界」

以吳雨霏歌曲《愛是最大權利》參賽的黃智雯，除了有幾個位置走音之外，更有力有不逮情況，表現奇差，乃全晚最低分一個，連評判也一致圍插，「百彈齋主」巫啟賢先開腔：「你把聲又乾又窄！」Eric則說：「都講咗唱歌要注重咬字，你仲要係演員添，所以呢方面我都忍唔住扣咗佢分。」智雯即解釋歌曲是首次演繹，結果被評判鬧得更甘，不諱言比賽當然要挑選一首熟練的歌曲最為重要，力斥她準備不足，明寸智雯有點hea！

黃智雯以最低分出局，梁烈唯雖有得留低，歌藝亦遭狠批。

張名雅被叮走，周啟生憐香惜玉呵番。

而張名雅則揀了天后容祖兒的《華麗邂逅》，惟唱功麻麻兼走音，大抵也不滿自己表現，故名雅唱罷即哭成淚人，不過她卻辯稱感動及唱現場緊張所致，未知是否憐香惜玉，巫啟賢即稍為收斂，指名雅有膽識，惟音準有一點問題，更謂：「你唔係專業叫唱得好完美，有自己風格，不過要心中有歌，唔係目中無人。」之後更着趙增熹把key調校，好讓名雅再演繹一次，雖然如此，但Eric卻直言畀分很低，他謂：「因為呢首歌係我寫，好難唱，你唱唔到感覺，境界好似去咗恐懼世界咁。」當獲悉自己以尾二分數被「out」，名雅再次哭泣，名正言順喊住走！

唯唯唱衰首歌入三甲

至於盛傳內定三甲的梁烈唯，曾揚言對自己有信心，他以陳百強的《等》參賽，奈何唱功認真麻麻，中途明顯走音，又入錯key，事後唯唯即補鑊：「我有個位破音。」但此舉卻未獲巫啟賢原諒，他說：「全晚畀你係最低分，因為陳百強對我意義好大，寫第一首歌都係因為佢，佢好優秀，你唱首歌拍子上面一塌糊塗，係毀滅咗首歌。」周啟生則謂：「你好似陳百強咁靚仔，但真係要學唱歌，『百彈』講得啱，你唔識呢首歌我可以教你，你畀得起錢。」最終唯唯分數排第三名，完全切合內定三甲傳聞，不過卻對此謂：「如果內定就好，唔使咁緊張。」

雖然張名雅及黃智雯因最低分而被「out」，不過二人都沒有因此而心灰意冷，黃智雯還在微博叫粉絲不要失望：「我會繼續練歌，為自己的勇敢歡呼。」而張名雅亦獲一大班粉絲舉牌支持。

文：影視組