Lisa S.提早剖腹誕8磅B女

吳彥祖（Daniel）與Lisa S.拍拖8年，於2010年在南非成婚後，就一直努力造人，至去年終造人成功，原本Lisa的預產期為本月初，但小B女於上周四（5月30日）已急不及待出來見人！Daniel和Lisa昨早分別在微博和Facebook報喜：「很高興的向大家宣布，我們健康的女兒Raven Wu出世了，她帶給我們更完美的家庭，現在我們很興奮地踏進人生的新旅程！」難掩初為人父的喜悅。其後，Lisa所屬的模特兒公司亦表示，Lisa於上周四在香港剖腹產女，小B女重7.84磅。

濃黑髮嘴似爸爸

昨午，新手爸爸Daniel就偕同古天樂等出席《竊聽風雲3》開鏡禮，大家都紛紛為Daniel送祝福，他欣然接受之餘，更全程笑到見牙不見眼！他笑言老婆生得好快：「一入產房至出返嚟，都係廿幾分鐘。（點解咁快？）因為係開刀，BB個身打橫，唔可以自然生，但真係好快！」他繼續興奮說：「我有份剪臍帶！（拍片？）情境好恐怖，我望咗一眼咋，見到心愛嘅人畀人劏一刀，唔知點咁，Lisa問我點，我就話冇嘢。」他又笑指生產過程似打仗，自己來不及反應便見到囡囡，並透露囡囡重近8磅：「我自己出世都有9磅，Lisa話好大舊，大到似3個月大！（BB似爸爸定媽咪？）佢嘅濃密頭髮令我印象深刻，嘴就似我，但似係單眼皮。（未收水？）係啦，對眼似中國人多啲。」

因黃疸留院照燈

Daniel還透露囡囡有黃疸問題，故目前仍留院照燈箱，太太亦留院陪囡囡，會餵食母乳。女兒的英文名Raven由Lisa和Daniel改名，爺爺就負責改中文名，但爺爺怕香港天氣熱，故9月才會從美國返港探望乖孫。Daniel計劃送珠寶給太太作獎勵，並會為女兒成立教育基金。問他會否再追多個？他首先表示這一刻未諗，但隨即改口表示半年後再追，即被記者取笑「太快」？他笑說：「係半年後先開始諗。」又自言知道有女兒後，覺得很害怕：「知係女已經癲！好驚佢有狂蜂浪蝶，Uncle要幫手睇住！」他又承諾待Lisa精神好些及囡囡「收水」後，便會公開一家三口照，並謂太太今次生產很保密，連朋友和公司同事也不知道。而楊千嬅夫婦、馮德倫和姚晨等得知Daniel榮升爸爸的好消息後，昨日紛紛在微博送祝福。

文：名人組　

採：影視組