碧咸睇波咀女Victoria懶理

剛告掛靴離開球壇的萬人迷碧咸(David Beckham),現時轉做全職「湊女公」,一家六口前日現身洛杉磯睇冰上曲棍球比賽,被現場KissCam選中的他選擇不咀老婆Victoria轉錫囡囡夏柏舒芬(Harper Seven),父愛滿瀉!

萬人迷碧咸自退役後一直忙個不停,除了全情當「湊女公」外,更盛傳他有意當球隊班主,甚至勇闖荷里活,跟好友「靚佬湯」湯告魯斯(Tom Cruise)一樣當動作巨星!前晚碧咸一家現身洛杉磯欣賞冰上曲棍球比賽,同場還有靚佬湯與其養子康納(Connor),「兩家人」全程笑不停,相當熱鬧。

示意女兒望鏡頭

在比賽期間,現場會有「KissCam」環節,被鏡頭選中的觀眾要即場咀嘴,正當碧咸與囡囡夏柏被鏡頭選中時,他選擇不咀坐在身旁的Victoria,即時指向半空向夏柏示意鏡頭的位置,隨即錫了囡囡一啖,場面相當溫馨,夏柏看到自己上鏡亦忍不住笑了出來,十分趣致!正當各人因為這一幕也興奮大笑時,向來黑臉的Victoria亦只是翹起半邊嘴微笑。而碧咸忙着湊女,幾乎無時間與靚佬湯吹水,睇得興起就一齊起身尖叫,同場還有戴黑超睇波的加國小天王Justin Bieber。

多元化發展吸金

同日早上,碧咸抱着穿了背心短裙的夏柏於洛杉磯行滑板店,夏柏看滑板表現興奮手指指。除了當「湊女公」外,前日有指碧咸將會在本星期到訪邁阿密,洽談有關成為美國職業足球聯賽新球會班主事宜,另外,亦有指碧咸向來希望當動作片明星,而靚佬湯眼見對方已退役,現正是好時機替好友實現願望,故極力爭取碧咸於《職業特工隊5》(Mission Impossible 5)演出,同時亦傳出碧咸會與名廚好友戈登拉姆齊(Gordon Ramsay)開餐廳,不放過任何吸金機會。文:外娛組