徐子珊心急扶住復工
無綫花旦徐子珊星期一晚在將軍澳電視城拍攝劇集《My盛Lady》被地上積水跣倒撻傷尾龍骨，子珊當時有十分鐘動彈不得不斷痛哭，隨後被送往將軍澳醫院急症室治療。原本獲監製放假兩日休養的子珊昨晚已經心急復工，她約六時四十五分乘七人車返到公司，穿上平底鞋的子珊步履相當緩慢，但精神卻不錯。
水泡護大陣
子珊講傷勢時表示已經好得多，她說：「多謝關心，尾龍骨腫咗，照咗X光冇骨裂。（咁快復工﹖）醫生開咗幾日病假畀我，但係自己覺得情況ok，唔想阻礙大家，同埋呢幾日都係拍辦公室戲，唔使走動，大家都會錫住我嘅。（唔再着咁高嘅高踭鞋﹖）自己唔夠高冇辦法，意外冇人想發生嘅，就算嗰日着平底鞋都一樣會跌親。（黃子華內疚﹖）唔關子華事嘅，我會同佢講番。感動朋友、同事嘅安慰，朋友叫我買水泡，但點解唔係買咕o臣呢。」
子珊撻傷尾龍骨最令人擔心會否影響她生BB，子珊：「當時自己都嚇親、好混亂、淨係喊，都冇問醫生，唔緊要啩，個醫生幾靚仔，希望之後冇後遺症啦。」子珊指之後嘅補戲會繼續親身上陣，還提議導演「唔好嘥」用她出事撻傷片段。
文：影視組