娜姐煮掂人夫Avis落寞稟神
失戀周秀娜dry到爆，前日黐實曾傳緋聞的人夫電影監製黃永峰，孖住行超巿，狂掃食物玩煮飯仔，毫不避忌地齊齊慶祝兩人生日。至於娜姐舊愛陳偉成（Avis）則前往泰國拜佛，祈求有新戀情出現。
周秀娜自從年初和Avis分手後，感情生活陷於空白，前日下午五時，娜姐黐實早年合作電影《熱浪球愛戰》時曾傳緋聞的人夫電影監製黃永峰現身中環。當年Avis曾打爛醋埕，並(目及)到實女友，如今娜姐回復單身，再次和黃永峰合作新片《爆3俏嬌娃》，兩人亦不避忌地愈行愈埋。
「咪咪」失蹤
穿上拖地長裙的娜姐和黃永峰並肩行入位於中環的超級巿場，失戀後寄情工作消瘦不少的娜姐，這日連平時驕人的咪咪亦離奇失蹤，兩人狂揀芝士、鵝肝、乳酪及調味料等，全程有商有量，娜姐不時被氹到咯咯笑，記者上前問到是否親自下廚？她笑容滿面地說：「都係嘅，我同啲friend一齊都有煮嘢食嘅。（大家讚多定彈多？）梗係讚啦！我煮個湯佢哋飲晒o架，連啲渣都食埋。」
泰國求愛
兩人買完食物再去爆谷店及花店，黃永峰友善地對記者說：「娜姐同我差不多時間生日，我哋同啲同事一齊搞生日會。」娜姐則八卦地問記者：「點解咁多記者？（你大粒嘛。）我好細粒o架咋！」當晚娜姐將生日會大合照放上微博，並留言向黃永峰講生日快樂，對方迅即多謝她，更笑言如將蛋糕掟到她面上更開心。
娜姐有已婚監製相陪，舊愛Avis早前則去了泰國拜佛，祈求有新感情出現，問他在當地有否艷遇？他說：「冇呀！有都唔敢試。（有冇幫娜姐求埋？）冇呀！」
文、攝：追蹤組