Amanda S.夜蒲三人行 老公眼冤
向來恩愛的名模Amanda S.與老公Christian，前晚結伴到中環夜蒲，Amanda竟然當着老公面前，與同行男子傾到搭晒膊頭，當老公冇到。另外梁漢文亦與太太外出撐枱腳，卻找來已為人妻的葉佩雯做「電燈膽」，兩個阿太傾到唔停口，冷落了隔籬另一半，所以Christian同梁漢文都好冇癮。
名模Amanda S.去年忙於打理其餅店生意，因而忽略了其意大利籍老公Christian，體重亦因壓力而下降慘變人乾，幸好現時生意上了軌道，她希望能抽多點時間陪老公，並表示要養好身體計劃造人。
前晚趁着周末，戴住紳士帽的Amanda與老公往中環夜店消遣，坐低冇耐，即有人送上食物，她亦毫不客氣地大啖大啖吃，兩人平排而坐，邊食邊傾。曾揚言要計劃生B的她，突然煙癮起，忍不住即場抽起煙來，更不時舉杯飲酒。
西裝男搭香肩
至凌晨2時許，見Amanda與一名穿西裝的外籍男子先行步出，兩人在門外傾談時，西裝男突然一手搭住Amanda香肩，她不但沒有縮開，還傾得十分投契，其後等埋老公及其他朋友出來，齊齊轉場到附近夜店繼續狂歡。即使老公在場，Amanda依然跟另一位四眼男傾個不停，她更被男方逗到見牙唔見眼，而行在後面的Christian未知是否感到眼冤，期間不時兩頭望，十分冇癮。
葉佩雯做燈膽
另外，梁漢文（Edmond、梁炳）日前與太太林文慧到中環餐廳晚膳，竟然找來音樂人好友郭偉亮的老婆葉佩雯做「電燈膽」。眾人至凌晨12時才埋單走人，紮上辮子的Edmond先行步出餐廳到附近街頭取車，然後當柴可夫送埋郭太返家。
文、攝：追蹤組