朱晨麗愛講feel不會濫情

我喺香港租幾千蚊劏房住，返學都係搭叮叮（電車），當時好慳o架，每日唔會用超過五十蚊，每日早餐都係買幾蚊個嘅麵包食，有時仲好似師奶咁買嘢格價，而且平時好少買嘢，除非大日子，生日新年就會奢侈一點，買鞋買新衫畀自己，但都只係幾百蚊。雖然咁慳，不過屋企條件係OK，唔係窮，亦唔係外界講霉到要住劏房，我只係唔想浪費佢哋嘅錢！讀書時算係好幸運，拎過幾次獎學金，而且相比其他內地來港讀書嘅女仔，同學其實對我幾好，起碼冇因為我係內地嚟而歧視我，我見有啲都畀人孤立，可能佢哋覺得我讀書唔錯，所以對我好好啦，哈哈。

同李晉強唔過電

至於同香港先生冠軍李晉強被人影到搭港鐵，估唔到會傳緋聞，我同李晉強只係朋友！咁啱當時大家當選後成日一齊出活動先熟絡，但唔會係過電嗰種，更加唔係「一腳踏兩船」，當時個男友因為好少見面，而且佢話要去第二度做嘢，大家覺得感情維繫唔到先分開，唔關第三者事。至於馬國明，都係嗰句，我哋係朋友。我認為女人係要戀愛，要有滋潤，不過拍拖要講feel，唔啱唔會一齊，我係寧缺莫濫嘅人，所以曾經拒絕唔少人追求o架，而且感情冇咗就冇咗，我唔會因為失戀而極度唔開心。

朱晨麗認為女人必須要愛情滋潤。	李晉強不是朱晨麗杯茶。	朱晨麗（左）自爆初時對許亦妮印象麻麻。

許亦妮傾出友誼

呢個圈入面同我最熟嘅係同屆港姐許亦妮，大家咩都會傾，係好好朋友。但唔講你唔知，初時參選嘅時候，我對佢冇乜好感，覺得佢個人唔係幾好，可能同佢當時嘅負面新聞有關，男友成日換畫唔係咁好，覺得佢好隨便。但有時做朋友要了解對方先知究竟佢好唔好，記得選完後同佢仲有兩位港姐出埠做慈善活動，佢同另一位女仔同房，但嗰位女仔唔多願意，仲有啲面左左，係邊個唔講喇，咁我之後咪同許亦妮同房。開頭大家都冇乜嘢講，間房好靜，記得佢之後撩我傾偈，仲講佢啲心事畀我聽，我就話畀佢知之前我唔太鍾意佢，初時佢聽到當然唔係咁開心，不過同佢傾落，其實佢又唔係咁差，諗深一層我係畀報道而影響到對佢嘅睇法，亦因為嗰次同房，大家更了解對方，之後就變成好朋友。

朱晨麗	朱晨麗曾與舞蹈員古思宇拍拖。	自言是傳統女人的朱晨麗，會組織家庭生ＢＢ。

16歲初戀 男友校草

我拍拖都幾慳，大時大節都唔會特別慶祝，因為怕浪費錢，所以每段情都好平淡。我拍過應該三次拖，最深刻要數初戀，當時16歲只會拖吓手仔，初戀男友係學校校草之一，記得佢寫咗張紙叫同學畀我示愛，張紙裏面寫咗情詩，大家之後就係咁開始發展。其實拍拖好少去行街睇戲，印象最深刻嘅係同佢第一次出街，點知返宿舍時竟然蕩失路，當時係夏天，行到我好攰，佢就孭我返去，見佢孭得我太辛苦，不過佢仲死頂話唔攰。但最後因為我要去第二度讀書就分手，其實我一直以為大家唔會再聯絡，但之後大家撞番，當時都幾開心，可能你會話呢啲係緣分，但大家冇咗戀愛感覺，而且佢已經有女朋友，所以做番朋友好啲，依家大家仲會傾心事添。

跳舞傷腳 恐變不育

有時我都會諗我係咪好脆弱，以前試過跳芭蕾舞整親隻腳，當時幾唔開心，因為冇得表演，而且受人冷落，覺得我扮嘢。而之前又再整親，真係幾擔心，可能會冇得生仔喎，雖然我未遇到另一半，但我係一個傳統嘅女人，有人可能會選擇唔生，但我唔會，而且我又鍾意小朋友，將來想有自己嘅家庭。慶幸我及早去處理，而且醫學昌明，所以依家已經好番，仲要多謝診治我嘅醫生，將我嘅煩惱撇清。

後記

娛樂圈話題無奇不有，早前更爆出女星處女論，雖然不少女星避談是否已失身，但這話題已觸動不少宅男的神經。朱晨麗聞「失身」二字，反應甚大不斷傻笑︰「唔好講呢啲啦，呢樣嘢好尷尬，我哋轉話題啦。」未幾她的臉開始紅起來，頓時變了怕醜小女孩，這模樣確實非常搞笑。

口述：朱晨麗

筆錄︰藍裕彤

攝影︰沈健程

場地︰Zummer

服裝︰Ted Baker