娜姐無懼走光離罩頑抗

「第32屆香港電影金像獎」昨晚假文化中心舉行。紅地氈繼續是一眾女星爭艷之地，周秀娜、陳靜（Da Da）、黃婉曼、楊千嬅，甚至文詠珊（Janice Man）不約而同Deep V上陣。周秀娜中門大開迎戰，「胸湧」到離罩令記者擔心她隨時春光乍洩，她大方透露自己真空上陣：「都有黐膠紙嘅，其實最緊要靚。（真空都好堅挺喎。）件衫設計得好好。（戰鬥格博導演們賞識？）咁我第一次擔任頒獎嘉賓喎。」

嘉玲撐行偉仔

一向身材驕人的黃婉曼紅地氈上露出超過5吋事業線，走起路來更見「跌蕩」，不過當記者指她超性感搶鏡時，她卻不認同謂：「冇呀。（又畀人話個樣唔同咗？）人會變嘛。」她又否認有「僭建」谷胸：「以往以tube dress上陣，感覺冇今晚有條帶喺膊頭咁安全。」而「龍女郎」張藍心以白色tube dress現身，同樣大方展示3吋事業線。

嘉玲雖然打扮密實，但以1億元珠寶裝身，貴氣逼人。	成龍同露出強勁事業線的張藍心齊到場。	江若琳 裙:Elie Saab

劉嘉玲是晚收起性感，以一身鮮紅Valentino打扮，再配上價值接近港幣1億的卡地亞珠寶現身，隨即閃爆紅地氈。她翹着老公梁朝偉到場，被記者追問是否想以紅色帶旺偉仔再奪影帝，嘉玲豪氣表示：「就算我着黑白佢都照攞o架啦。（睇好邊個？）佢對手好強，不過我梗係偏心o架啦。」談到偉仔正在放假，會否陪對方出埠散心時，嘉玲即嬌嗔答：「睇佢想點囉。」馬詩慧與囡囡王曼喜以母女露背裝現身，為金像獎紅地氈添上新鮮感。

黃婉曼波濤洶湧，卻被評沒有美感。	鄭中基與太太余思敏獲伯爵贊助逾五百萬的首飾及腕錶，當中余思敏的鑽石手錶最名貴價$1,748,000。	馬詩慧及王曼喜 兩個都over咗，佢哋刻意營造孖公仔，但反而大家拖累大家，馬詩慧應該着番自己年紀嘅款式，阿女咁青春，可以着啲鮮色嘅。

江若琳險跪低

「升呢」當候選影后的江若琳盛裝而至，以Elie Saab晚裝、腳踏7吋高跟鞋配以1200萬港元的英皇珠寶上陣，盡顯貴氣。一再強調入圍而達成自己目標的她，卻忽然失魂落樓梯時差錯腳，幸而旁邊有猛男出手相助，未致出醜人前，事後她搞笑謂：「平時都冇穿過咁高嘅鞋，好彩身手好啫。」而鄭中基與太太余思敏則獲伯爵贊助逾500萬的首飾及腕錶登場。不過以一貫西裝Look現身的劉青雲最終「意外」成為「最佳衣着」得主，獲Piaget伯爵珠寶送出18K袖口鈕作獎品，事後他打趣指這個獎最難得，皆因對手太多。

周秀娜

舒淇曾經着差唔多款嘅，但周秀娜着上身即輸晒，佢個人比較黑同乾，唔應該着呢啲灰綠色，而且件衫着到離晒罩，件衫包唔晒個胸，好肉酸，好失望。

江若琳

冇乜睇頭，貼身通花喱士拖尾，要身材高挑嘅人先着得好，但佢好瘦冇乜肉地，又唔高，carry唔到條裙。

黃婉曼

佢嘅膚色好白好靚，唔應該再着肉色裙，搞到好肉地，感覺只係一舊肉，而且件裙好似唔啱size，太突出個胸，包得唔靚。

劉嘉玲

雖然好密實，但展現高貴大方的一面，件衫隻色同款都好蝦人着，無咁上下料會着到好老氣同肥，但嘉玲真係好好睇，佢能展現出氣質，啲衫着係佢身上好少會失手。

文﹕影視組