李嘉欣爆小JM變馬迷

昨日李嘉欣以愛彼女皇盃大使身份出席第15屆愛彼女皇盃獲選參賽馬匹名單公布會，同場還有玩具大王蔡志明兒子蔡加讚與未婚妻汪圓圓、藝人何傲芝等，場面熱鬧。嘉欣表示賽事當日會與老公許晉亨（亨亨）出席，至於小JM（Jayden Max）從未到過馬場，她擔心相機的閃光燈會嚇怕他。嘉欣稱小JM很喜歡馬匹：「佢見過侏儒馬，好想摸，佢見到四隻腳嘅動物好鍾意，想飛撲埋去，我屋企禁止養寵物，等佢大個養馬啦！」小JM雖未有機會接觸父母的兩隻愛駒「一寶」及「貳寶」，但年紀細細已懂得為愛駒打氣，嘉欣說：「佢會喺電視機前舉起雙手為兩隻馬打氣，手舞足蹈，好似個小馬迷咁。」

亨亨怨仔手「鞋」

提到內地爆發H7N9禽流感，嘉欣透露小JM有如常返學：「佢都有傷風同咳，我會好小心，唔應該停晒佢嘅活動，（預防措施？）勤力洗手同抹手。有人叫我唔好再用酒精同囝囝抹手，話搞到隻手『鞋』晒，我話你寧願隻手『鞋』，定係囝囝用隻手揩面搞到有病入醫院？（嗰個人係你老公？）係，佢好介意人隻手『鞋』。」嘉欣謂剛接了一個上海的工作，三星期後出發，去兩日一夜，如果到時疫情失控就會取消。

嘉欣稱小JM會為兩隻愛駒打氣。

汪圓圓日前患病，未婚夫蔡加讚唔捨得隔離。

圓圓病倒引恐慌

同場的圓圓透露剛從上海及大連參加親友婚禮返港後便病倒，引起少許恐慌，她說：「加讚都好擔心，佢有陪我睇醫生，醫生話我冇發燒，只係感冒。（加讚有冇隔離你？）冇呀！佢唔捨得。（照舊有錫錫？）冇隔離囉！」提到加讚胞姊加敏公開催圓圓趕快生BB，她坦言生兒育女很大責任，最重要兩人準備好，問她準備好沒有？她坦言：「順其自然。（已經不設防？）結完婚先啦！」

而何傲芝被問到感情生活時，甜笑謂：「都係咁，好開心，了解中。」提到日前她與緋聞男友蕭正楠入馬場被拍到即時彈開，她解釋：「唔想引起咁多誤會。」她稱只是被最近有指其父嫌蕭正楠窮而反對二人拍拖的報道嚇怕，她又為父說好話：「爸爸冇干擾我工作同識朋友，佢有見過蕭正楠。（爸爸覺得佢點？）冇討論過，如果係我選擇，佢會支持。」她稱曾為報道而痛哭，反而獲父安慰，並謂不介意成為箭靶。

文：名人組