Mandy未捽先high準備獵仔
混血名模Mandy Lieu不但精於擺甫士拍照及主持節目介紹旅遊景點，百足咁多爪的她近日又有新搞作，將處女下海為逾千人打碟搞氣氛，搖身一變成為DJ女郎。
一向愛嘻哈大笑的Mandy原來有頗高的音樂造詣，自細便已摸熟鋼琴及小提琴。Mandy雖然以古典音樂「起家」，但她愈大愈愛節奏感強勁的現代音樂，而且又有跳舞底子，因此Mandy對打碟感到既興奮又緊張：「當我知道下星期五（19日）要喺過千人嘅『Hennessy KYRIOS Electrosonic Party』打碟搞氣氛，即刻聯絡DJ朋友偷師，我打電話畀佢哋請教，仲叫佢哋教埋我擺甫士，實行有姿勢有實際！」
自認太癲
身為名模的Mandy可謂樣靚身材正，相信現身夜店定必吸引一眾狂蜂浪蝶，但Mandy竟然慨嘆甚少男仔埋身，皆因自己太過癲：「我因為有跳舞底子，一去到就起勢咁跳，跳到出晒汗，頭髮都黐晒喺塊面度，可能因為咁啲男仔都唔敢埋身。」Mandy已回復單身幾年，這段時間令她好好了解自己，她說：「依家已經準備好畀其他人了解自己啦！」
搵正經男
不過Mandy坦言不介意在夜場找到真命天子：「我覺得喺邊度識男朋友都冇所謂，最重要係緣分。」她希望找個「正經」男友：「因為我個人太過外向同太癲，所以想搵個正經男朋友balance（平衡）番。」她更教路男生如何在燈光昏暗的夜場突圍而出：「如果着白色同閃閃嘅衫就可以畀人一眼望到，機會自然比較多！」
文：戴玉霖
攝影：沈健程