娜姐歡迎蔚雨芯老翻
宅男女神周秀娜（娜姐）入行時被指是翻版樂基兒，現在的娜姐今時唔同往日，已經升呢，人紅當然有人會跟風。日前有報道指同樣擁有32D魔鬼身材的歌手蔚雨芯抄襲娜姐，無論胸、衫或樣貌都撞晒。不過娜姐就說未聽過，並自稱是戰鬥馬，不會理會在後面追逐的人，更笑言有機會要與蔚雨芯相認。
宅男女神周秀娜前晚以超密實騎師造型現身跑馬地馬場，雖然收埋32D豐滿身材，娜姐仍魅力四射。對於有指亦擁有32D的歌手蔚雨芯是翻版娜姐，撞胸、撞衫兼撞樣，娜姐表示沒睇新聞，並說：「幾好呀！（似樣都幾好？）似唔似都冇所謂，都希望大家好。我係戰鬥馬，如果有人喺後面追，我會好努力咁向前衝，唔理後面嘅人，大家做自己嘅嘢。」同時亦似暗示叫追求者放膽追求。娜姐還笑言有機會要與蔚雨芯相認。
下注睇意頭
娜姐前晚為活動客串講馬經，並說有賭馬：「我唔係好識，但唔係第一次嚟馬場，身邊都有朋友玩。」她又說買馬沒心水，只會選好意頭的馬名下注：「好似今晚（前晚）落雨，如果有隻馬叫『水為財』我一定買。（贏過馬？）有，不過會用贏番嚟嘅錢做善事。」
娜姐又希望將來遇到好的「騎師」和「練馬師」，令事業更進一步，記者問為何她不做騎師？她笑說：「我隻腳仲傷緊（早前拍戲韌帶受傷），冇得騎人住，好番先。」娜姐透露自己韌帶撕裂，但不用動手術：「不過依家要繼續拍戲，日常生活OK，但要小心。」
文：名人組