君如逼供 志偉焗愛阿倫世世相守
口才了得的志偉也有被「拋窒」之時！前晚台上加插《星星同學會》特別版，主持吳君如問「多情」志偉「一生中最愛」是誰，志偉有口難言，譚詠麟（阿倫）為志偉解圍：「過去就由得佢過去。」
志偉即醒目指阿倫是他的「一生中最愛」，但也取笑阿倫「大嘴巴」，阿倫反擊說：「我就好佩服志偉善心，專收留啲無依無靠、冇衫褲着嘅女仔。」志偉為免阿倫再發難，即感性說：「我哋一定一齊嘅，第日我哋啲骨灰都會放喺隔籬。」
君如繼續狙擊志偉，暗寸他「到處留情」如大樹盤根，志偉說：「陳可辛都係我收養嘅，但佢娶咗你我哋就決裂，我唔要啲咁雜嘅女人，你唔覺得你個女有啲似我咩？」
君如笑說：「同你我做唔出囉。」志偉又在台上多謝汪明荃和鄭裕玲（Do姐）等老拍檔，又指對住Do姐不敢遲到，Do姐卻踢爆說：「佢都照遲到，但我都接受咗。」直到尾聲，眾人上台唱生日歌祝賀志偉，他竟突然叫停，原來要邀請與他同日生日的黃杏秀上台齊齊切蛋糕！
