謝茜嘉冰冰 型格鬥
方格是今期最流行的圖案，所謂方格，顧名思義是正正方方，每個方格的比例大小都一模一樣，不會夾雜其他紋理。但星級形象指導郭慶彬（Ricky）點醒大家着方格圖案的衣服時要分外留神，要視乎自己體形，因為大方格易令體形膨脹，反而細方格就可把亮點集中，有修飾身段之效。荷里活女星Jessica Alba（謝茜嘉艾芭）與中國女星范冰冰最近撞裙亮相，同樣穿上黑白方格裙子，配搭卻各有心思，前者富時尚美、而後者則富古典美，各不讓對方專美。
傅明憲
襯得好好，黃調造型好sharp，配埋個紅色手袋，望落去有種度假feel，好初春感覺，而且微曲髮型令成件事加咗分，令佢個人young咗，好有活力。
容祖兒
呢個款同顏色都幾易襯易着，配襯銅色短boots，成個感覺更加新潮，平衡番個girly味道，略有型格。
張雨綺
第一眼畀我嘅感覺係腳粗，對白色鞋好似襯到好絕，但效果麻麻，反而我認為襯黑色會更加靚。其實佢身形都好靚，不過大格仔容易顯得肥、有肚腩，細格仔會安全啲。
姬絲汀史釗活
佢唔係高，但着到比例好平均，好睇。而且佢襯咗對ankle boots，感覺有型。雖然同張雨綺着同一套衫，但就出咗好唔同嘅感覺，一個斯文，一個型啲、潮啲，我認為姬絲汀着得好睇啲。
Kristen Dunst
佢白滑皮膚同金色秀髮襯起啡白格長裙更搶眼，呢款長身晚裝裙有別於典型晚裝裙，個款好modern，直身剪裁，着到佢身形好修長。
謝茜嘉艾芭
黑白方格長裙好凸顯佢嘅蜜糖膚色，黑色clutch同黑色尖頭高跟鞋嘅全黑配襯好穩陣，將髮型放埋一邊，整個look望落好順眼，係簡單時尚美。
范冰冰
黑白方格簡簡單單，最有心思係配搭咗個短皮手套同白色手袋，梳埋個復古髮型，襯出另一個時尚氣息嘅古典美。
郭慶彬Ricky
星級形導郭慶彬(Ricky)早前遠赴米蘭與巴黎時裝周，出席Max Mara、Sportmax、Chanel、Valentino、Gucci與Jean Paul Gaultier等品牌，也曾被邀在中國時尚節目《美麗俏佳人》擔任嘉賓主持。Ricky曾為李冰冰、吳君如與張惠妹等擔任造型師，地位被肯定。