冼色麗讚祖兒專業冇架子
英皇藝人演員冼色麗 （Bonnie）入行五年，去年與樂壇天后容祖兒因合作電影《Diva華麗之後》而相識。Bonnie讚祖兒親切冇架子，更是一名專業演員。二人不但因合作而成為好友，更因而獲英皇賞識，招攬成為藝人。
Bonnie與樂壇天后容祖兒（Joey）於電影《Diva華麗之後》結緣，二人更成為好友。除了贏得友誼外，她更獲英皇電影賞識，並被招攬為旗下藝人，絕對一箭雙鵰。
飲食 友誼飆up
「早前我接拍咗電影《Diva華麗之後》，好榮幸被英皇電影賞識，所以加盟咗佢哋。我喺戲裏面係飾演容祖兒（Joey）嘅助手，我第一次同佢合作，佢畀我嘅印象係一個好大方、冇架子嘅人。雖然佢係天后級人馬，但係佢真係好謙虛。最難忘拍第一場戲嗰陣，佢主動同我講『我拍戲經驗唔多，多多指教！』又或者當佢遇到唔知點做嗰陣，佢又會好坦率咁講『哎呀！我唔知點做呀！』畀人感覺好親切，完全冇階級觀念。同埋佢做嘢嘅態度真係好專業，就算嗰場戲冇佢嘅戲份，佢都會留低喺度睇。
我哋成班人去咗清遠取景，成日一齊飲飲食食，大家熟得好快。我哋成班女仔主要都係講吓八卦嘢，分享吓着衫、化妝心得咁。雖然拍完咗之後大家少聯絡咗，不過佢都有請我去睇佢演唱會，真係令我覺得好驚喜！」
Bonnie於電影《囡囡》中飾演援交女，當中更有全裸演出，可謂搏到盡！為免家人擔心，她更不惜瞞着至親，直至拍攝完成，可謂為藝術而不顧一切。
曾經 「裸膽」演出
「其實我入咗行五年，講到最難忘嘅經歷，一定係我拍電影《囡囡》。因為裏面有啲涉及性嘅場面，喺銀幕上係全裸，不過拍嗰時當然唔係全裸啦，但都完全挑戰咗我嘅底線。裏面都有大露背嘅場面，係我前所未有咁大膽嘅演出。其實當初我接呢部電影，一來係覺得題材好具話題性，二來係知道導演畢國智一向拍開有藝術性嘅電影，同佢溝通過後覺得安心。其實喺拍攝嗰陣，我唔覺得有任何問題，因為清咗場，而且大家溝通好先拍，所有床戲都一、兩個take就拍完，成件事好順暢。
不過我真係一個衝咗之後先識驚嘅人，依家睇番呢套電影，真係會覺得有少少陰影，但對我嚟講係一個好好嘅經驗。其實我之前一直冇同屋企人講，一來唔想佢哋擔心，二來佢哋好信任我、畀好多空間我，所以我喺拍完之後先同佢哋講番。佢哋睇咗之後都冇話我，不過就不斷追問我拍攝上嘅細節囉，好似啲性感場面會點拍、做咗咩準備工夫咁。」
曾經歷過冇job接的黑暗時代，Bonnie深明靜待時機的道理。與其一直慨嘆懷才不遇，倒不如多看各類型電影，裝備好自己，待機會來臨時重錘出擊！
裝備 靜待時機
「入咗行之後，我感受最深嘅係，原來做演員係要靜待時機、要等待嘅。初入行嗰陣，雖然好想不停工作，但係自己冇名氣，冇人會搵你。嗰時覺得自己好冇用，唔知下個機會幾時嚟，好唔開心、好低落，甚至諗過放棄。不過同朋友傾過，自己又諗清楚之後，就發現與其自怨自艾，倒不如用等待嘅時間睇多啲電影，搵自己有興趣嘅嘢學，好好裝備自己。
做藝人手停口停，冇工作嗰陣，我會唔會冇錢使？哈哈！其實我一直都有嘢做嘅，一直有拍吓廣告同劇，都算有啲積蓄，加上屋企又唔使我養家，所以生活都勉強可以維持到。既然係自己選擇咗嘅路，我又鍾意演戲，喺未有少少成就之前，我係唔會放棄嘅！」
抗拒同圈戀愛
入行數年均與緋聞絕緣的Bonnie，坦言目前單身，但並不急於找男友。喜歡陽光男孩的她，笑言不希望伴侶是圈內人：「如果兩個都係圈內人，見面嘅機會會好少，好難維繫。」她有此焦慮不無原因，皆因她與前度亦是因長期分隔異地，而令感情生疏。她說：「其實我入行之後有拍過拖，對方係圈外人。不過因為佢被公司調咗去第二個國家工作，所以聚少離多，加上各有各忙，所以我哋就分開咗。」
甘做阿四 照顧愛貓
Bonnie家中養了一隻英國短毛貓名叫「Mushroom」，視牠為心肝寶貝的Bonnie笑言：「我養咗佢一年半，每日返屋企，最期待係見到佢！就算返工再攰，見到佢都會覺得好開心，所以煩惱都一掃而空。」她更笑言自己為了Mushroom而甘心做「阿四」，無論工作多忙，都堅持每天親自幫牠抹眼及抹耳朵，以及定期剪指甲。她笑言：「其實我以前係想養狗，雖然最後揀咗貓，但係我間唔中都會帶佢去平台散步，等佢郁動吓，健康啲！」
口述：冼色麗
筆錄：龔凱欣
攝影：劉智源
服裝提供：Ted Baker
化妝、髮型：angelashum@ymail.com
場地：Faces