蔣怡愛情長跑13年有嫁期

現年35歲的女藝人蔣怡（CoCo）與42歲的珠寶設計師男友翁狄森（Dickson）拍拖13年，終於開花結果，記者昨日在婚姻註冊處中發現二人的擬結婚通知書，據資料顯示他們於上周一（４日）遞交表格，男方申報為珠寶商人，女方為藝人，而他們的登記住址同為西貢。

婚禮未搞住

記者致電恭賀Dickson時，他笑言：「今日好多人打畀我，其實我哋向來都有咁嘅計劃。不過仲未搞住婚禮，可能要往後推，因為唔想太趕，嗰日只係貪得意，好多嘢未籌備同準備好。（點解會突然交表？）嗰日有啲律師朋友叫我哋交表，我哋咪貪得意交表囉！不過我哋向來都有呢個準備。（你話貪得意，女友會唔會唔開心？）唔會，總之有好消息會通知大家。（點解當日咁即興？）冇呀，日日都咁開心。」二人向來熱愛大自然，Dickson稱婚禮會從這方面構思。

蔣怡與男友翁狄森拍拖13年，上周入紙註冊隨時成家立室。

曾穿過不少婚紗行騷的蔣怡，得到不少同行女模的祝福。

同行送祝福

CoCo則透過經理人公司回應：「CoCo有通知公司，知道佢已經交咗表，幾時結婚及安排要再了解。其實佢哋咁多年一直有籌備，只係近排想實行。」CoCo今日將飛大陸工作，趁結婚前努力搵錢。模特兒出身的CoCo，淡出模界後轉型為藝人向台灣發展，近年甚少在港露面。

一班模特兒好友包括琦琦、姚書軼、陳嘉容、周汶錡及馬詩慧等知道他倆結婚的消息都大感高興，指兩人拍拖多年非常合襯，早已視他們為夫婦。琦琦說：「我相信Dickson一定會設計一套好特別嘅珠寶畀（未來）老婆戴。」陳嘉容則向二人催生：「希望佢哋快啲生個超高嘅BB出嚟。」馬詩慧向他們授予夫妻相處之道：「夫妻相處好在乎彼此性格，好難有一條方程式，總之最重要係大家互相信任同包容。」

文：名人組