羅力威Sing誘粉絲 氹攞錢
歌手羅力威早前舉行歌迷聚會，獻唱新歌之餘更收買佬上身，要「威迷」籌集2000年推出的一百元紙幣，粉絲們不久已集齊一疊疊的一百蚊紙，被拋窒的羅力威鬼馬地作狀塞錢入袋，並扮走佬，場面爆笑。
羅力威早前與過百「威迷」在酒店慶祝歌迷會成立三周年，一班粉絲着上淺藍色制服到場，場面相當壯觀。心情大好的羅力威即席獻唱兩首未派台新歌冧歌迷，一眾威迷之後仍大呼未夠喉，一向對粉絲有求必應的羅力威亦識做地安哥，場面就像開個唱。
期間羅力威更化身收買佬，與粉絲玩遊戲，本想考起歌迷的他得戚說：「我要2000年嘅一百蚊紙！」豈料不足一分鐘，粉絲已集齊了一大疊，被拋窒的羅力威不服輸說：「估唔到你哋咁叻，咁我唔客氣啦，哈哈！」說罷就作狀將整疊一百蚊紙塞入褲袋，場面爆笑。
承諾做好音樂
到聚會尾聲，鬼馬的羅力威突然一臉情深說：「你哋陪咗我三年，希望大家可以保持每年三聚嘅傳統，而我亦會做好音樂回報大家。」受感動的「藍色軍團」即捉住羅力威合照兼送禮物，當中更有粉絲自製貼滿相的心意卡，收禮收到手軟的羅力威還笑言：「啲禮物多到塞爆車，助手都差啲冇位坐，多謝晒！」
文：音樂組