伊健代妻出氣怪責無綫
婚後的鄭伊健變了「愛妻號」，昨日現身活動，對無綫不用蒙嘉慧（YoYo）出席新劇宣傳，伊健指無綫既想YoYo續約，卻又禁她宣傳，直斥無綫處事奇怪，誓要為愛妻護航。
鄭伊健、林德信、劉浩龍、王菀之和盧凱彤昨日出席澳洲旅遊局「全世界最筍的工作」的招聘活動，五位推廣大使均對份澳洲筍工有興趣，而伊健則自嘲已超齡，但相信若他願意當地旅遊局都會為他安排，更會帶太太YoYo一齊去。
講誠意唔睇錢
不過，講到有傳YoYo過檔王維基旗下，無綫新劇《仁心解碼II》即不用YoYo參與宣傳，可覺無綫做法小器？伊健直言：「TVB係一個機構，機構係唔會小器，唔知邊個人處理，佢哋有少少奇怪，一邊叫人續約，一邊又唔畀人宣傳，咁點續約呀。」
問到YoYo是否已簽王維基？伊健謂：「傳啫，好多嘢要講誠意唔係睇錢。（TVB冇人情味？）我識好多當年戰友都離開咗無綫，有好多嘢唔需要講出嚟先改變，要『養住』，正所謂人心肉做。」伊健更說出面的條件好好，會度身訂造角色讓演員發揮。而亦有指YoYo為伊健打理玩具店生意？伊健澄清：「唔知點解會咁傳，我係鍾意玩玩具，但唔會將興趣變成生意。」
賺多啲先拍拖
另外林德信（Alex）被追問早前生日派對兩位緋聞女友松岡李那及王秀琳（Mango）齊現身？Alex坦言當晚除兩人外，還有大班男女朋友，指兩人都是靚女。問到發展機會？Alex謂：「唔會，朋友咋，我想賺多啲錢先諗拍拖。」