林淑敏出嫁生B睇天
無綫藝人林淑敏（Mandy）與男友陳中原昨日於教堂舉行婚禮，「玩具大王」蔡志明任主婚人，新娘子數度感動落淚，丈夫喜歡小朋友，惟戰勝癌魔的她正服食藥物未能懷孕，新郎哥體貼的說會視乎太太健康情況才想生育問題，還讚太太200分，外表只有25歲，氹得Mandy開心不已！
37歲的「抗癌勇士」林淑敏於2010年患上乳癌，幸一年後抗癌成功，昨日與拍拖13年、經營建築生意的40歲男友陳中原在教堂舉行婚禮，王祖藍、李亞男、王君馨、朱慧敏、江美儀、陳美詩等圈中好友到場外，蔡志明夫婦亦有出席，蔡生還充當Mandy的主婚人，新娘挽住其手臂進場，將她帶到新郎身旁，場面感人！
流下喜悅眼淚
及後高皓正、祖藍及彭家麗開金口獻唱，亞男、鄭子誠負責讀經，新娘子談及與丈夫相處點滴時忍不住流淚，其後新郎與Mandy咀嘴，全場歡呼。完成儀式後Mandy鬆一口氣，說婚禮比想像中完美，是所有弟兄姊妹送給她的禮物：「聽到佢哋講起往事好感動，呢條路走到依家真係唔容易。（點解請蔡生做主婚人？）喺加拿大嘅親人因急事嚟唔到香港見證，靈機一觸諗起搵蔡uncle做主婚人，佢待我好似親生女咁，灌溉正確觀念畀我哋，遇到困難又會幫手分析，我覺得好適合，佢都一口答應。」
還樓債繼續做
婚後可會積極造人？Mandy坦言正服食藥物，佗B有難度：「老公好鍾意小朋友，我唔知咁樣有冇虧欠佢，好在佢冇覺得呢個係缺點，所以要睇主耶穌安排。（幾時蜜月？）屋企人3月中返，到時會食餐飯，可能會一齊去旅行。」婚後Mandy會繼續工作，她說：「手停口停，依家400萬買樓係窮人恩物，所以要為家庭努力！」陳中原大讚太太值200分：「佢今日25歲（指樣貌）呀！生唔生小朋友就睇佢身體狀況啦。」
文：影視組