楊冪入主3,300萬豪宅 隨時做劉太
今天是情人節，不少藝人如鄭融、李蘊及賈曉晨都花盡心思冧另一半。「煙韌情侶」劉愷威及楊冪昨日專程從北京返港見家長兼拜年，小鳥依人的楊冪搭實男友膊頭步出機場，據知劉愷威此行重點是帶女友返現值3,300萬新愛巢慶情人節，兩人愛得癡纏，相信隨時結婚！
現年38歲的劉愷威與26歲的內地影星楊冪拍拖年多，雖被外界以女尊男卑形容「楊威戀」，但其實近年劉愷威成功進佔內地市場，去年更被譽為內地四大小生之一，賺到盆滿缽滿，可謂名成利就。一向愛得高調的楊冪亦多次被拍得到片場探望愛郎，兩人曾被拍得當眾又攬又錫，難怪男方揚言會計劃今年結婚。
見記者即縮手
昨午4時25分，齊戴黑超的兩人從北京孖住抵港，楊冪搭住男友膊頭步出機場，劉愷威則負責推行李車。女方一見記者即怕醜縮手，更躲在男友身後，而劉愷威則神情輕鬆地稱此行是帶女友回港向父母拜年。
問到何時結婚派利是？劉愷威笑而不語，離開機場直往父親劉丹寓所。之後他接受電話訪問時稱：「我哋留兩日就走o架喇。」問去北京是否向未來外父外母拜年？他甜笑說：「係，佢哋好Nice，令我好舒服，我亦有逗利是。女友呢幾日會留喺新居，搬入去之前佢有睇過，亦都好鍾意。（層樓係咪送畀女友？）其實層樓係落咗我媽媽同楊冪個名。」
問到如何慶祝情人節？劉愷威肉麻地說：「日日都係情人節o架啦！其實我好少返香港，呢幾日主要係陪屋企人。（買咗咩禮物？）唔使特登買，因為平時見到啱心水嘅禮物都會買畀佢，同埋我哋日日都一齊，點去買呀？（咁楊冪有冇預備咩禮物？）冇喎，其實今年係我哋第二個情人節，上年都係咁過。」
劉丹有讚冇彈
記者之後再致電「準老爺」劉丹，問到未來新抱楊冪可有上門拜年？心情靚爆的丹爺笑到收唔到聲地說：「哈哈哈！佢好乖，啱啱嚟咗。（有冇準備靚餸？）佢食半齋咁滯，食得好清，唔會大魚大肉。」他又稱：「好多朋友都有讚佢同我個仔乖，又話我個仔真係識揀。」丹爺對未來新抱的口味瞭如指掌，相信已經準備好飲新抱茶。
近年在內地賺到開巷的劉愷威，去年年中豪擲3,000萬購入半山梅道蔚皇居一個1,398呎的單位，據知該單位購入不足6個月，保守估計已升值10%。此外，為力證女友地位，劉愷威更在物業上加上楊冪的名字，相信兩人婚期不遠矣。雖然劉愷威強調此行主要回港探親，但一向心思細密的他必定悉心安排與女友共度情人節，除帶楊冪向未來老爺劉丹拜年外，更一齊入住愛巢過佳節。
文：音樂組
攝：謝國華