黃偉文得西太后撐同志

時裝達人黃偉文(Wyman)於米蘭時間13日在當地為Vivienne Westwood 2013秋冬男裝騷擔任模特兒,雖然人在彼邦,Wyman不忘響應「撐同志反歧視」運動,並邀請西太后Vivienne Westwood支持。

【劉慰思米蘭直擊】Wyman在時裝騷上以尊貴嘉賓身份行騷示範其中一套服裝,並帶領其他模特兒謝幕又獻花給西太后及其丈夫兼創作總監Andreas Kronthaler,成為首個登上國際時裝天橋的香港名人,認真有面!

關心平等問題

近日演藝界發起「撐同志反歧視」運動,不少藝人手拿顯示「撐同志反歧視」屏幕的電話或紙條拍照再上載微博表支持,身在外地的Wyman不但身體力行撐到底,還請來西太后撐場,他說:「我喺後台趁有時間,都搵佢影一張相撐同志,其實我都係受何韻詩同黃耀明所託,點知佢一口答應,仲話可以幫我拍埋片,我覺得佢唔淨只係一個時裝設計師,仲係一個透過時間傳遞有意義訊息畀社會運動嘅人,西太后除咗地球暖化問題,仲關心平等問題。」

感受勾心鬥角

Wyman又說原本有意在行騷時拿出顯示了「撐同志反歧視」口號屏幕的電話,但為免影響表演流程而作罷,改為在後台影相。談到騷後心情,Wyman回復幽默本色,笑言模特兒也有勾心鬥角的場面:「行喺後面嘅朋友仔(男模)話我知,行到台前唔應該企喺度,否則會大塞車,我行完後去問人,點知個個都有喺台前停低,原來模特兒界都有勾心鬥角,真係人心難測,我當佢係跣我。(覺得自己表現點?)尚算OK,對我嚟講,係一個體驗。」