祖兒鬆口氣祼跑慶功
樂壇天后容祖兒（Joey、祖兒）繼續掃獎掃到手軟，前晚在《十大勁歌金曲頒獎禮》中再奪4.5個獎，並八度成為「最受歡迎女歌星」，她開心表示想即刻脫掉戰衣裸跑慶祝。至於獨攬三獎兼首度拿下《最受歡迎男歌星》的林峯，坦言「好滿足」。
容祖兒前晚以一襲重達20磅的銀色連身裙現身頒獎禮，艷壓全場。祖兒透露這襲戰衣穿得她死去活來：「條裙內置腰封，將我25吋腰箍到變23吋，坐低連氣都透唔到。」完成頒獎禮後，祖兒更笑言：「好想即刻除咗件衫，裸跑慶祝，不過要響屋企做，奔放啲。」
無諗過10奪歌后
對於8度獲得「最受歡迎女歌星」，祖兒坦言：「真係好心滿意足，一路以來我都希望可以多啲唔同嘅平台畀我繼續演出同唱歌。」問她可想挑戰十度獲封《勁歌》歌后？她說：「我從來都無Set呢啲目標，總之我無諗過退出，我仲好有表演欲，企喺台上好有滿足感。」專注事業的祖兒更稱連嫁人的想法亦沒有。事後祖兒特地乘車到門口跟一班歌迷見面，粉絲舉起燈牌祝賀祖兒，連開幾支香檳慶祝。
至於林峯前晚連奪《十大金曲》獎和《最受歡迎華語歌曲》銅獎，並首次摘下《最受歡迎男歌星》大獎，對此阿峯表示所願以償：「好滿足，無諗過可以拎到咁多獎，《最受歡迎男歌星》獎我由細睇到大，知道自己有份角逐後就好想拎。」問他可覺是無綫對他失落視帝的補償？阿峯表示：「無得補唔補，每個頒獎禮都有一套公平嘅準則，最緊要自己出席心態健康，對我嚟講最緊要繼續有工開。」大會司儀曾志偉在台上就鼓勵林峯不要對獎項輕言放棄，亦有傳他拒絕接受《亞太區最受歡迎男歌星》的獎項，阿峯表示：「我從來都無諗過有唔拎，亦無人通知過我會有呢個獎。」
拖堂妹圍爐慶祝
對於他在公布得獎前就先換定跳舞歌衫，阿峯就解釋：「因為唱嗰首歌有Dancer，要提早準備，所以頒畀我之前工作人員已經通知咗我。」完成頒獎禮後，大批「峯迷」聚集在TVB門口，為阿峯開香檳慶祝。其後阿峯就連同堂妹林夏薇、經理人樂易玲及曾志偉等，現身佐敦跟黃柏高及旗下藝人一同打邊爐慶功，直到近凌晨三時，才盡興離開。
文：音樂組