薛家燕踩入亞視宮雪花伸冤
近日無綫與亞視「破冰」大聯盟，起勢力抗王維基的香港電視，昨破例派出「TVB大使」薛家燕，踩入亞視任「藝訓班」導師，更獲亞視全台隆重其事，以「總統式」恭迎。「抽水王」宮雪花亦出盡「花」招，拎出字聯和向傳媒伸冤，成功搶鏡！
無綫昨日破例派出「TVB大使」薛家燕，首踏亞視擔任「藝訓班」導師，分享其演藝心路歷程，吸引近半百傳媒見證歷史性一刻。亞視高層鄺凱迎和葉家寶率領旗下藝人魏秋樺、朱慧珊、黎燕珊等共二十多人，在大堂恭迎家燕姐蒞臨，非常大陣仗！無綫節目《東張西望》的攝製隊亦再次派出許家傑到場採訪。
乘坐TVB小巴、在三名助手陪同下現身的家燕姐，甫抵達即與亞視高層握手，並獲劉錫賢獻花，眾人又走到寫上「歡迎家燕姐回亞視授課」的布景板合照。其後，亞視高層盛品儒亦傍住她入課室，藝員出席率更高達32人，幕後人員則有廿多人，認真畀面！席間，家燕姐不時笑學員「係咪次次有上堂？」、「十點返學好早啫！」，更為藝員發聲爭取車費津貼，反應熱烈。不過，據知無綫一心派出曾於亞視工作的家燕姐任親善大使義務教書，豈料對方以「回亞視」大字標題，令無綫感到不高興。
高歌鼓勵團結一心
而「抽水王」宮雪花（花姐）亦做足準備上課，多番於堂上積極發問兼大笑，令家燕姐也無奈說：「畀啲機會同學先好嗎？」花姐更忽然衝上台前伸冤，高舉寫上「冤枉我不是六十七歲，還我公道，委屈我有買三盒餅，要求道歉，家燕教路」的字聯和報紙說：「你婚姻出現問題，大家都好錫你，但媒體就唔畀機會我搵食！」家燕姐則安慰她：「睇你37歲啫，美艷動人，個樣仲好慈祥，你有新聞價值先吸引到人報道你。」
另應屆亞生黃集鋒於尾聲殺出來，問新人如何上位？家燕姐即抵死地說：「你依家走出嚟已經上咗位，但你冇料就好快落位。」最後超時於個半鐘後落堂，事後家燕姐邊唱《皆大歡喜》主題曲，邊笑指無綫與亞視「團結一心有新轉機」，並謂這次未有收任何費用。另盛品儒表示期待與無綫多互動，並謂支持無綫就發牌入稟高院司法覆核。
文：影視組