發哥攝影展玩盡鉑金印相
國際影星周潤發除了是神級影帝外，其攝影技術亦同樣超水準，近日他聯同十位攝影發燒友齊齊搞黑白相攝影展，更用到坊間少見的鉑金印相技術（Platinum Prints），與粉絲及市民公諸同好。
一向是攝影發燒友的周潤發，每年均會參與攝影展展示其作品，不過今年他卻要搞搞新意思，除了將相展命名為《攝影展覽—光影13之老餅鏡》，他又利用十九世紀末相當盛行的鉑金印相技術去沖晒靚相，實行要做到美感與矜貴並重！他表示：「以前不嬲都有搞開相展，不過今年比較特別啲，因為我同一個攝影朋友鄭振耀張相都用咗鉑金印相技術去沖晒，呢種技術喺香港比較少見，所以我都希望可以借呢個機會推廣一下呢種咁特別嘅技術。」
發哥又透露印相過程複雜，要先用的鉑鹽液搽上相紙，之後再用紫外線進行特殊沖晒，又要用上畫紙代替普通相紙，難得發哥願意將製作技術如此高的作品公開，可想而知他非常重視今次的攝影展！至於影展叫為「老餅鏡」，因參展作品是使用舊鏡頭拍攝。
不收入場費
今次發哥所參展的靚相，是一張特色風景相，見照片黑白對比鮮明，立體感突出，更儼如一幅油畫，明顯是經過發哥的精挑細選，他說：「今次攝影展張相係我今年去北京嗰時影落，我見張相入面嘅風景同光線都配合得好好，所以我就揀咗嚟做攝影展嘅作品。」
今次發哥的相展將會一連三日在香港中央圖書館的地下展覽館展出，由本星期五（明日）下午二時開始，展覽至星期日下午六時，更難得是相展不收入場費。
文：專案組