羅仲謙被爆 蠱惑招溝掂楊怡

王晶監製的新片前晚舉行首映,重演鄭伊健經典角色的羅仲謙自覺夠Man,不需要問視后女友楊怡意見,但相信對方會買飛入場,而三哥受訪時竟笑謙仔因為夠蠱惑先溝到楊怡。而近期有官司的梁烈唯獲不少TVB藝員撐場支持,見他表現甚High,不時手舞足蹈!

由羅仲謙、梁烈唯、沈震軒、莊思敏及黃貫中等主演的電影《古惑仔:江湖新秩序》前晚舉行首映,TVB高層樂易玲與一眾藝員苗僑偉及戚美珍、苟芸慧、陳庭欣及王君馨等撐場,已過檔王維基公司的黃日華與樂易玲一度近距離同場,但華哥似乎不太樂意。

謙仔表示「派成績表」心情緊張,問到演陳浩南有否問女友楊怡意見?他說:「冇呀!係都問男仔。(問佢點Man啲?)我憑自己感覺演。(買飛同佢睇戲?)相信我拍電影佢會支持啦!(贏鄭伊健喺佢心目中地位?)你幫我問佢!唔敢自己講。」另外,三哥接受電視台訪問時竟笑說:「謙仔唔蠱惑都唔會溝到楊怡啦!」

唯唯暫唔使借錢

導演王晶對於與王家衛的《一代宗師》打對台,他表示不擔心。提到周星馳承認與他不熟,晶哥寸嘴說:「唔熟咗好耐啦!十年冇來往!(星爺話拍好戲先有錢。)我相信佢好小量錢來自電影,多數係炒樓!」他又承認與唯唯的合作「Hold住」,暫時逐部簽,不擔心對方愈收愈貴。

是非不斷的梁烈唯心情仍大靚,在台下手舞足蹈,又與黃日華女兒黃芷晴玩電話,但他不願多提官司,只表示想取回公道,問到預算花多少錢?他說:「未知,都要六位數字,但暫時唔使問人借錢。(王晶話唔簽你住,改以逐部簽?)希望佢回心轉意啦!」

此外,武術指導伍允龍最近被搭上Race(黃婉伶)而跟鍾嘉欣情變,前晚他表示與Race已多月沒有見面,問到是否有安慰分手的Race?他說:「冇乜嘅,朋友傾下。(嘉欣知唔知?)點會唔知?」暗示與嘉欣關係冇變。

文:影視組