葉德嫻開騷禁令多 唔畀遲到
葉德嫻（Deanie）昨日出席演唱會記者會，守時的她自爆當年經常遲到搞到犯眾憎，亦成為她人生的污點，對於甄妮直斥鄧紫棋（G.E.M.）不打招呼沒禮貌，同是前輩兼有話直說的Deanie力撐G.E.M.說：「佢有同我點頭。」
葉德嫻（Deanie）將於3月8日起假紅館舉行三場「deanie SING FOR ME 2013 葉德嫻演唱會」，她昨日盛裝出席記者會，戴上手套的她拿起咪時走到台邊向工作人員說：「點解好地地一支咪要搞到立黐黐？叫經理見我。」隨即否認不是要求高的人，她說：「係啲人差。」
唔想歌迷送花
Deanie姐又不停在台上問多個主辦單位「蝕唔蝕得起」，並呼籲歌迷要準時入場，更列出多條禁令說：「千祈唔好帶螢光棒、送花、遲到同盜錄，大家將錢以我名義捐去慈善機構得喇。」還自爆當年經常遲到犯眾憎：「係人生污點。」當介紹舞台設計時，Deanie談到四呎半高的升降台，並百無禁忌地笑說：「好似講緊棺材。」
望張耀榮納妾
影大合照時，Deanie主動拖實演唱會主辦單位負責人張耀榮，並笑說：「佢話如果納妾會納我。」問到當年經常遲到是否遭人痛罵？她說：「冇人敢鬧我，係反省同討厭，以前我都食煙，搣甩咗條脷感覺多咗味道。」當問到有否遇過被後輩不禮貌對待？直腸直肚的Deanie說：「我去睇騷見咩人都點頭，有時人哋真係唔識我，我又唔識佢，唔想人覺得我冇禮貌。」隨即問傳媒發生何事？當知道甄妮怒罵G.E.M.冇禮貌，Deanie力撐G.E.M.說：「我有睇佢演唱會，我有同佢點頭，佢都有同我點頭，每個人價值同角度唔同，各自為政。」
採訪：音樂組