江若琳男女同歡酒店耍盲雞
聖誕節將至，江若琳前晚出席活動時表示已經計劃成班朋友去酒店訂房開聖誕Party，有男有女齊齊着睡衣玩耍盲雞，又大呻自己聖誕無拖拍，見人成雙成對，難免感到寂寞。
著名時裝設計師何國鉦（Dorian）的Doll by Dorian Ho系列前晚於時裝店Harvey Nichols推出，江若琳、惠英紅、何倍倩、岑麗香、蔣家旻等嘉賓均有出席慶祝。何倍倩剛宣布已懷孕三個月，前晚都扮靚靚到場出席支持Dorian。聖誕就到，江若琳表示準備聖誕搞睡衣派對：「我諗住Book間酒店房，喺房玩耍盲雞，講明唔可以化妝，有男有女，但男仔全部都係朋友嘅另一半，個個都係成雙成對，我就得自己一個。」問到是否嚴禁「開飯」（吸毒），江若琳即表示：「我哋玩埋小學雞嘢，（吸毒）唔會發生喺我哋身上，好陌生。」
岑麗香愛包包面
岑麗香（香香）因公司有記招而遲到，香香解釋自己不是扮大牌。提到有網民指她面頰圓似麵包超人，香香表示似麵包超人幾可愛。問到香香怎減包包臉，香香直言：「識我都知我面圓，自己開心同接受就得。（會唔會打Botox？）唔會！我鍾意面圓有福氣。（怕唔怕趕走宅男？）自己不嬲都唔似女神，鍾意我嘅人會接受我。」今年獲三個提名包括「我最喜愛電視女角色」、「最佳女配角」、「飛躍進步女藝員」的香香坦言看好黃智雯及江美儀。
同場的惠英紅笑言希望Dorian做多五十年，可以有贊助。提到傳她患上抑鬱，惠英紅直言是很久的事：「我有事嗰排有搵屋企人，自己唔好畀壓力自己就得，我依家都向公司請假，可以有時間陪媽咪。」問到今年視后、視帝人選，她表示：「我睇好楊怡同米雪，米雪演技就唔使講。」
文：名人組