黃宗澤揾老婆三嫂做辦

歪理教誨 另類教育

戚：我識得Bosco梗係因為三哥啦！唔係點會識到咁後生嘅靚仔？大約七年前，三哥返嚟TVB拍第二套劇就同你合作，覺得你好有禮貌，會主動同我哋打招呼，之後愈來愈熟，有時你仲帶埋媽咪出嚟一齊食吓飯。

黃：其實我初時覺得三嫂都幾嚴肅，你知啦！三哥咁大件，對住你都有啲笠水喎！

戚美珍做生意有一手，黃宗澤笑謂將來亦要偷師。

三嫂與賈思樂（右起）、吳啟華、盧海鵬齊演舞台劇籌款。

戚：佢對我好恭恭敬敬o架！

吳卓羲（左起）、林峯及黃宗澤三人常搞Gag，引得旁人哈哈大笑。	胡杏兒與黃宗澤之前感情穩定，連三嫂亦睇好二人。	放大圖片

黃：所以我覺得應該幾堅喎！點知一開聲就穿煲，三嫂係個好開心嘅人，好照顧我哋，不時煲湯我哋飲，畀到我大家姐或者阿嫂嘅感覺！

戚：我覺得你好陽光，三哥後生都係咁，咩人都傾得一餐，好活潑，感覺親切！你同吳卓羲、林峯呢班年輕人成日搞Gag，令我都後生咗！

黃：都係向三哥學o架咋！有時我整蠱三哥話一齊去蒲，佢又玩埋一份話好，但一聽到三嫂個名就唔會啦！我哋成日講笑，好開心！

戚：以前你同胡杏兒一直好好，成日見到呢對小情人，我仲覺得有啲似我同三哥當年咁，但係過去咗就唔好提喇！之前你感情方面發生事，你都冇同我傾訴。

黃：唔使特別傾訴，就算有咩唔開心，三哥會彈啲歪理出嚟，一句搞掂我，我覺得呢啲係三哥三嫂嘅另類教育，都係叫我唔好諗咁多，都係想我開心。

戚：你又好好，知道三哥鍾意古靈精怪嘢，行街睇鞋睇衫都會問埋三哥，而且次次都好啱心水！

黃：我淨係幫三哥買咋！佢貪靚嘛！你睇依家佢仲穿耳窿添！

等好拍檔 進軍商界

戚：嚟緊我同賈思樂、盧海鵬、林建明會再演舞台劇籌款，舊年好受歡迎，我就諗不如換你哋班後生仔做嘉賓，又可以吸引到年輕Fans！

黃：大家未必記得，我初初入行都做過《歡樂今宵》，呢段日子唔長，但識咗鵬哥、江欣燕！就算係八十年代嘅《蝦仔爹哋》我都有睇，鵬哥啲金句吓吓都押韻，我仲記得o架！

戚：嚟緊有好多角色未Firm，但我對你好有信心，一定考唔到你！

黃：今次真係大考驗，唔知得唔得o架！臨場睇吓點囉！

戚：你咁奀皮，我驚你剝鵬哥衫咋！上到台可以奉旨整蠱前輩，到時唔知會發生咩事！

黃：係呀！會私器公用，總之令觀眾開心。

戚：可以考慮搵你哋班後生仔演我男友！

黃：咁我惟有扮三哥囉！你話我似三哥，我都想似佢咁遊戲人間又多朋友，仲有個模範太太！最厲害係你做生意都有一手，我都想試吓做生意，但未有時間！

戚：都係機緣，可能遲啲有人搵你拍檔呢！

黃：所以話有另一半幫到手，都幾開心呀！

戚：其實我睇好多你嘅劇，真係不斷進步中，你幾多樣化，演忠、奸、有錢、窮都得，要令人信服係好難，好似三哥咁，外形太敦厚高大，以前演啲機靈角色都爭啲，所以你係有天生優勢，攞視帝指日可待。

黃：多謝多謝！其實我冇乜諗獎，人哋覺得我呼聲高咗，因為年紀大做咗長輩咋！

三嫂靚湯飲到舔脷

Bosco大讚三嫂「入得廚房、出得廳堂」果然沒錯，訪問當日三嫂帶同一大煲蓮藕章魚湯往探班，三哥及Bosco飲到Lam Lam脷，三嫂說：「因為佢兩個呢排捱夜拍劇，個湯下火，煲多啲仲可以分埋畀其他人飲。」她更笑言已準備五頭鮑魚作明年的賀年菜，「利誘」Bosco向她拜年，認真大手筆！