連詩雅巡舖谷碟 捧自己場
剛推出新碟的連詩雅無懼寒風，穿上背心裙親臨唱片店巡視「碟」績，為攞好意頭，她更掏腰包買了兩張大碟，但堅拒割愛，兩位緋聞男友周柏豪及關楚耀亦統統冇份！另外，雖然華納近日眾多歌手出碟開騷，但她力證公司絕冇分薄資源！
隔了兩年，連詩雅（Shiga）終於再出第二張大碟，屬緊張大師的她日前冒着14度低溫，身穿背心裙打扮，並親自到尖沙咀唱片店「監場」，巡視最新銷情。為攞好意頭，她更掏荷包自費買了兩張新碟，寓意好事成雙！問到兩張大碟會轉贈緋聞男友周柏豪和關楚耀嗎？她說：「唔會！我要畀自己留念，所有朋友都要自己買。而媽咪為咗支持我，話會買幾十隻添！」現場更有粉絲一口氣買了十張唱片以示支持，令Shiga大感驚喜。
歌贈舊愛到此為止
提及官恩娜剛加盟華納做一姐，加上眾多歌手出碟開騷，問到公司可有將新碟資源「縮皮」？Shiga大讚公司絕冇偏心：「新碟封套搵咗著名攝影師幫我影，加上5首歌都有拍MV，絕對冇分薄到資源！」
Shiga又自爆最愛歌曲《到此為止》，皆因歌詞夭心夭肺：「首歌係送畀舊愛嘅一封信，令我回憶到好多嘢。（有畀佢聽？）冇呀，畀唔畀佢聽已經唔重要！（是舊愛Rapper曲赤？）梗係唔係啦！」她表示為報答公司上下工作人員，已準備請他們擦大餐，並定期搞粉絲聚會。
文：音樂組
攝：鄭家俊