鄭嘉雯預支蜜月 不設防
前港姐鄭嘉雯（Karman）與晨曦足球會班主之子周志豪下月五日結婚，二人早前到了莫斯科拍婚紗相及預支蜜月，逾月行程周遊列國，加上新婚將至，一對新人更趁開心之旅不設防造人，Karman笑說：「未必咁易中，試吓啫！」
Karman與周志豪於下周三在酒店舉行盛大喜宴，一對新人與圈中人稔熟，兄弟、姊妹團不乏明星陣容，包括：周家蔚、姚子羚、洪天明、梁烈唯和范振鋒等，就連郭富城與張智霖亦會到賀祝福。由於Karman的同屆港姐老友周家蔚亦是姊妹之一，懷近八個月身孕的家蔚到時將是姊妹團中受保護的人物，Karman稱：「我唔會畀佢做嘢，唔准佢着高跟鞋，只係扮靚出席陪嫁就得！不過，天明做兄弟團都好，可以照顧老婆！」
望一擊即中
婚禮已準備得七七八八，Karman透露最近正控制體重去穿靚靚的婚紗。而她與未婚夫早前到莫斯科拍婚紗照，更在不少特色景點取景，此行，二人亦預支蜜月，不設防造人，希望一擊即中，結婚便第一時間宣布喜訊，Karman坦言老公是長子嫡孫，當然想盡快為周家繼後香燈。她說：「老公係大仔，爺爺嫲嫲都想快啲抱曾孫，而我哋又鍾意小朋友，都想快啲生！（壓力？）都緊張，所以努力中，但又怕依家有，會肥到着唔落件婚紗！不過，我又諗唔會咁易中嘅……所以試吓不設防！」
完成在莫斯科兩日的拍攝後，他們便到瑞士、意大利等地旅行，Karman說：「歐洲好多地方嘅治安感覺上不太安全，有日我book咗架的士出機場，見個司機半瞌眼嚟開車，我都有啲驚！」
文：影視組