阿Sa相隔十年再蝦伊健
蔡卓妍（阿Sa）與鄭伊健難得「十年一聚」，默契無減反增。阿Sa片場繼續「欺凌」好友，反獲伊健大讚內心溫柔。談到未婚妻蒙嘉慧（YoYo），伊健直指是「典型港女」，可謂「膽生毛」！
當年一套《我老婆唔夠秤》令阿Sa與伊健成為紅極一時的銀幕情侶。基於情意結關係，導演阮世生月前決定「再續前緣」，開拍《我老婆唔夠秤2我老公唔生性》，電影於下月上映，男女主角接受記者訪問時不忘互笠高帽，女的讚男的「食咗防腐劑」樣子十年如一日，男的則指女的經常有「驚喜」送贈。
爆YoYo港女
阿Sa戲中繼續扮演野蠻人妻，並自創橋段「欺凌」好友︰「佢瞓瞓吓覺畀我用水照頭淋囉，加埋NG佢最高紀錄試過一日沖4次涼。」問到現實生活中她會否同樣施以「極刑」對待男友陳偉霆時，在旁的伊健即代言解圍謂︰「行為上唔知，但肯定佢心底係錫對方嘅。」
阿Sa戲中名字叫YoYo，與伊健未婚妻蒙嘉慧的英文名不謀而合。拍上集時伊健還未與蒙拍拖，來到這次卻已到達談婚論嫁的階段，問到伊健拍戲叫「YoYo」時是否感到分外親切？他謂︰「咁又唔會喎。（女友同阿Sa一樣咁野蠻？）一時時啦，佢係典型港女。（你咁大膽？）話人港女都唔係貶詞啫，其實香港女仔不知幾有性格又自立。」記者乘勢再追問婚期，伊健依然三緘其口。
將進軍內地
上集票房成績凌厲，如今續集上映在即，阿Sa與伊健同樣明言不會感到壓力：「我哋enjoy個過程，做好啲戲已經盡咗責任嘞，不過10年前上集冇進軍過內地市場，今次能夠喺內地上映，心情的確係有啲期待嘅。」
文：影視組
場地：蘭桂坊酒店@九如坊