李龍基搵命博 開騷拉小提琴
「酒廊王子」李龍基在80年代曾試過一日走八場，月賺廿多萬，但他淡然說：「嗰時我唱兩個月就買到一層樓，但我唔懷念，收入係多，但唱到聲帶同身體壞晒，仲割咗個膽！」不過隨着酒廊在90年代沒落，新一代偶像歌手湧現，李龍基陷入歌涯低潮：「嗰時冇人搵我唱歌，仲試過出場畀人噓，叫我收檔！」因此他轉型拍劇，但過了幾年又有機會唱歌：「多謝嗰班新歌星表現差，我呢啲舊人先有番市場價值！不過我覺得近排有番啲起色，謝安琪、鍾舒漫、G.E.M.都幾唱得，有實力嘅。（男歌手呢？）女歌手表現好過男！」
闊別香港樂壇十年，李龍基下月初將在九展開個唱，但今次他可謂搵命博，事關他會冒生命危險表演拉小提琴：「我細個自學，點知唔識用力整親條頸，條頸淋巴位突起晒一粒粒，醫生話我再拉嘅話會生淋巴癌，所以都唔敢拉太長時間！」
