C小姐被轟外景例遲 嫌疑法拉：最多十零分鐘

近日遠赴法國等地拍攝《衝上雲霄II》的陳法拉，日前被一自稱是無綫化妝師的友人，在微博指有份參演《衝》劇的「C小姐」常常遲到，幾乎每天凌晨五時半開始要捱眼瞓等「C小姐」現身化妝，但等了差不多兩小時後即臨出發她才出現，並寫道：「你是來旅遊？還是工作？基本準時也不懂嗎？」留言甫出，網友即議論紛紛並競猜「C小姐」是誰，由於法拉是唯一赴法國等地拍攝兼姓氏譯音與C相配的女演員，故矛頭自然直指法拉！

影響公投爭視后

峰迴路轉，該網友昨日卻忽然把有關「C小姐」的博文全部刪除，更充滿歉意的留言說：「今天開始不要說傷害人的話，請大家由自己做起！」似乎是怕事件愈炒愈大！原來是因劇組和工作人員溝通問題，令法拉無辜被指擺款遲到！由於法拉今年憑劇集《東西宮略》角逐視后寶座，在全民公投機制下，是非緋聞分分鐘影響票源，認真唔抵！

昨午返港的陳法拉接受本報電話訪問，強調拍攝以來一直跟足通告開工，法拉說：「咁耐以嚟只係遲過一兩次，每次都係最多十零分鐘，完全冇影響進度。今次係劇組人員同工作人員之間溝通有出入才造成誤會，個誤會已經解決咗。今次出trip雖然大家都辛苦，不過台前幕後都相處得好開心，好有團隊精神，最唔開心係啲雜誌寫埋啲是是非非。」

定欣監製撐專業

至於和法拉一起到外地開工的胡定欣，亦力撐法拉態度專業：「完全唔覺得佢態度差，仲好投入。每個演員都有佢嘅化妝師，喺香港開工演員都未必跟化妝時間出現，今次係喺外地，可能係溝通問題。」吳鎮宇對陳法拉被指大牌，則表示：「法拉不嬲自己化妝，我擔心其他人多啲。」

另外，《衝》劇監製歐冠英昨接受電話訪問時也為法拉護航，澄清絕無遲到：「英國、法國通告好密，好早就入黑，所以每朝四、五點就要開工。事後個化妝師話個微博唔係佢寫，只係同朋友呻過，之後佢都知係誤會，佢亦都同法拉冰釋咗，佢朋友都刪除咗啲博文。」

文：專案組