千嬅撐保留勁歌 王菀之唱反調
去年大肚未有參與四台頒獎禮的楊千嬅，前晚出席「2011 CASH金帆音樂頒獎典禮」，對於今年《勁歌金曲頒獎禮》盛傳最後一屆，千嬅支持保留，相反去年奪「亞太區最受歡迎香港區女歌星獎」的王菀之則為贏「尾彩」贊成取消。
前晚楊千嬅聯同王菀之、麥浚龍為賀好友林夕獲得「CASH音樂成就大獎」及「作詞家」獎，現場演繹林夕的作品，千嬅更是產後首度在港獻唱。提到產後可會不夠氣唱？千嬅說：「我諗頭三個月有啲，但經過調理同做運動，依家都OK。」之前在北京出席活動時因掛念兒子而眼濕濕，千嬅笑言：「當年聽到Kelly（陳慧琳）話掛到喊，我仲諗有冇咁誇呀，點知自己仲勁。」
一月演央視騷
至於今年四個頒獎禮，千嬅笑言：「冇收到通知，可能唔啱候選資格被飛啦！」而她補充說一月要返內地為央視演出。講到《勁歌頒獎禮》可能是最後一屆？千嬅則支持保留，因代表香港有其公信力。至於除原有四台不同頒獎禮外，若加上四台聯頒，即變第五個頒獎禮？千嬅不禁說：「係咪可以唔去，真係脫晒節。（話一人一票選？）咁都有意思嘅，各取所需啦。」
陳豪德斌捧獎
至於王菀之上屆奪「亞太女歌星」有機會成歷史？菀之抵死說：「咁咪好威，多咗個意義，包個靚尾，攞埋尾彩。（贊成？）好贊成！（話因為樂壇冇分量歌手？）唔理啦，尾彩得一個攞咗就係。」此外，陳豪和黃德斌憑歌曲《年少無知》贏得「最佳合唱演繹」獎，兩人稱現出外登台都成了指定歌曲。而方大同和林憶蓮奪「最佳男/女歌手演繹」獎。
文：音樂組