子丹以琴會「友」神級賀壽
張學友、古天樂、張家輝、甄子丹、梁家輝等歌影壇一哥，前晚雲集中環，為導演陳可辛賀壽！歌神、影帝級人馬輪住上台獻技，學友上台晒歌喉，子丹則以鋼琴伴奏，令人聽出耳油！陳可辛在派對上深情向君如送「肉嘴」，感謝對方為他捱通宵籌備生日P，溫馨滿瀉！
導演陳可辛（Peter）前晚50歲生日，吳君如「吹雞」花6位數於中環某餐廳為老公搞生日派對，娛圈重量級藝人畀面出席，如甄子丹、古天樂、金城武、曾志偉、梁家輝、張家輝、張學友、李嘉欣夫婦、邱淑貞夫婦、劉偉強等共80位朋友到場，星光幾乎勁過金像獎頒獎禮！嘉賓們為逗好友Peter開心，更輪住上台獻技，影帝梁家輝、張家輝、曾志偉與歌神張學友上台獻唱，由子丹彈琴伴奏，張家輝更技癢在張學友面前扮張學友，笑爆全場。
向君如深情送吻
論到最感人之處，當然是陳可辛切蛋糕時向君如深情送吻，並感激老婆不眠不休為他籌備今次生日會，而君如在學友陪伴下，齊齊上台獻唱冧歌《Rainbow Connection》，君如還爆老公見女兒陳是知彈琴賀他而感動流淚：「佢（陳可辛）好鍾意喊，仲第一次跪女人添（女兒）！佢當個女係『女神』，個女做少少嘢，佢都即刻撲出嚟，好似『女王駕到』咁，曾經試過講到『唔知睇唔睇到個女嫁』都喊一餐，好感性！」
君如昨出席活動時揚言今次為老公搞生日P，全因對方年齡「轉冧巴」，君如還幽默說：「4轉5嘛，我仲特登叫多啲女嚟，全部中女好似曾華倩、李嘉欣咁，成班『桃姐』級人馬，因為Peter有中年危機，所以批准佢做大丈夫，可以搵金雞，（咁咪即係你？）都話人生過半百，睇開啲啦！」她還笑言前晚擔任司儀的曾志偉難得無醉，但卻漏低手機；囡囡則因前晚太夜瞓，故昨日沒有上學。
梁家輝睇好青雲
學友與梁家輝離開時帶有醉意，梁家輝對自己入圍亞太影展影帝提名，直言沒信心奪獎反看好劉青雲，至於拍檔郭富城無入圍，他笑言：「有我喺度嘛！佢仲後生，再磨練啦！」至於早前傳背女友江美儀曳曳的吳君祥，前晚兩人恩愛到場，江美儀更十足新抱般照顧君祥父母夏春秋夫婦，兩人昨又在微博打情罵俏，江美儀肉麻地讚吳君祥靚仔過金城武。
文：影視組