千嬅戴罩變聲 嚇親囝囝
產後全面復工的楊千嬅，前晚專程從北京回來出席活動，患上重感冒兼爆瘡的她大嘆八天沒與兒子見面，還未習慣與兒子分離的千嬅，揚言為兒子推了不少往外地的工作，亦拒絕兒子出鏡太多，認真是二十四孝媽媽！
前晚楊千嬅一臉疲態姍姍來遲現身活動，老公丁子高亦有出席，千嬅表示剛從北京抵港，聲音沙啞兼爆瘡帶病上陣，原來在北京通宵錄音工作，她說：「太耐冇出埠工作，北京天氣凍又乾燥，返到嚟又熱，好似冰火咁，所以病咗！」由於生病故在家要戴上口罩，慨嘆兒子也不認得她：「戴咗口罩，又變咗男人聲，個仔見到都有啲驚！（未試過同仔分開咁耐？）係呀，今次係比較長時間，自己錄音都錄到喊。」
為善出鏡冇下次
問千嬅是否掛住個仔多過老公？她說：「老公視像可以有交流，個仔仲未識講嘢！其實個仔一歲前自己都唔想離開香港咁耐，有電影搵都唔接，人在片場但個心唔喺度都唔公平，拍戲都要投入！」談到早前為慈善與兒子一同拍攝年曆，她謂若非慈善也沒下次：「我自己做呢行知道辛苦，我會肉赤佢，好似嗰日啲鏡頭同射燈住佢，都嚇親佢！」
Lynn型讚城城
而同場的熊黛林（Lynn）被問到早前郭富城大讚她的年曆拍得很美，她聽罷即甜笑謂要送一個給他作聖誕禮物，那城城哪部分最靚？Lynn笑說：「唔可以用靚嚟形容，係型！（佢依家講親你都嘴角含春？）感覺係人逢喜事精神爽，（咩喜事？結婚？）佢電影收得好嘛，叫好叫座，我媽咪都喺南京睇咗，仲話票房應該可以過三億！」
對於城城表示想拍喜劇？二人可有機會合作？Lynn即說：「如果有機會我求之不得，其實佢某一方面都幾好笑，私底下佢個人都好搞笑，如果有機會嘅話大家都可以見吓佢呢一面！」
文：名人組