錢國偉：有女獻殷勤
曾炮製多個著名綜藝節目的監製錢國偉（Wilson），最近變身「港版Psy」二次創作《江南Style》，跳到幕前人氣爆燈！向來女人緣旺盛的他與一眾天使妹相處融洽，經常被拍到與女飯局，他更直認有女仔會主動獻殷勤，但Wilson自封怕醜仔拒認鹹濕。這位搞鬼監製將一連5日分享與異性的相處感受、對圈中生死之交及恩師的看法，以及30年前初出道的趣事等。
最近我扮韓星Psy跳《Hong Kong Style》估唔到咁受歡迎，有成幾百萬點擊，好開心令咁多人笑過！最初係幾個大細路諗住玩吓，古巨基同鄭伊健覺得我似，結果玩大咗！拍嗰陣佢兩個鬧得我好甘，有時我導演上身建議個鏡頭點擺，基仔即刻叫我收聲行番埋位，伊健就笑我再做得咁差，就拉隊走o架喇！好似將咁多年嘅怒火發洩喺我身上咁，但過程係好enjoy，佢兩個都拍得好好，最感動係曾志偉、林曉峰、錢嘉樂同一班天使義務幫手，全部唔收錢，依家使咗一萬蚊左右，但計到足可能要過百萬o架！
冇逼天使去飯局
事後好多女藝人怪我話做咩唔預佢添！好多人話我多女圍，事實上因為工作的確係，我同好多代天使仲好好感情，不時約出嚟食飯，冇嘢需要避忌，佢哋都叫我阿爸，咁仲點做其他嘢？而且年年有新人，邊諗得咁多呀？可能有啲好主動獻殷勤，但我反而唔鍾意，會閘咗！問我點同女仔維繫感情，呢啲天生o架喎！可能我個樣冇殺傷力，其實都係工作，我盡量公私分明，但預咗傳媒亂寫，一拖八去食飯啫！點可能一對八開房呢？
一直同所有女仔夥伴都相處好好，但幾年前有件事我真係嬲（註：09年「豆沙包」梁懿晴指被Wilson逼去飯局），我一早同天使講marketing好重要，要曝光，要出唔同活動先令人認得你，但每一次佢哋都有權話唔去，但佢（豆沙包）唔去之後又投訴我逼佢去，又唔見其他女仔有呢個感覺？講真佢都唔適合做呢行。
戀情一隻手數晒
畀人話係「鹹濕監製」，其實我介意o架！鹹濕同風流完全唔同喎！我覺得人係食色性也，係生活上嘅一部分，男女做嘢80％都係為咗異性，女性點解要化妝扮靚？男性點解要努力賺錢？都係為咗異性，而且鍾意欣賞靚嘅嘢係人類天性！話我鹹濕？其實我同各位男士一樣，我唔係特別鹹濕！有時去飲嘢，有男仔飲醉咗周圍追住啲女仔，但啲女仔反而匿喺我後面，即係覺得安全囉！
識我嘅朋友都知我又感性又怕醜，我一世人拍過幾次拖咋！一隻手數得晒，而且我唔會主動，初戀係二字頭先開始，中學男校都係玩暗戀，你話幾純情？所以我拍到好多宅男心情，點渴求一段戀愛，團火儲咗好耐！哈哈！拍戲咁多追女仔橋段都係假象啫！唔通徐克又好好打？之前話過對姚子羚有好感，都係一大班人食飯，冇表白過o架！至於依家感情事（女友「賓治」陳宛蔚）……不如轉第二個話題，我係偶像派喇！結婚就可能兩、三年後，我仲係搏殺期，買咗樓先結婚啦！
Profile 錢國偉（Wilson）
入行：1983年加入無綫任職辦公室助理、後轉往製作部出任助理編導、2000年成為非戲劇組綜藝節目監製。
成名節目：《獎門人》、《志雲飯局》、《美女廚房》、《變身男女Chok Chok Chok》。
電影作品：《戀夏戀夏戀戀下》、《喜愛夜蒲》系列
口述：錢國偉
筆錄：影視組
攝影：吳文聰