婷婷最like男友 隱形蜜語
謝婷婷與男友安志杰（Andy）是圈中出名甜蜜情侶，原來早在未拍拖前，Andy曾出動隱形墨水寫聖誕卡予婷婷，讓她打開卡時先呆掉，用燈照時則出現會時常掛念她的冧爆字句。Andy如此花心思，難怪他能贏得美人歸。
謝婷婷、丁子高、模特兒楊汀叮等前晚出席Parker Ingenuity系列發布會，婷婷坦言自己有寫情信給男友安志杰，而她最難忘男友送給她的第一張聖誕卡：「佢用隱形墨水寫，要用支燈照先睇到，嗰時未拍拖，佢祝我有個好嘅聖誕，同埋話會成日諗起我。」
丁子高丟晒舊情書
對於有指她約滿王晶經理人公司後，即拉同事離開一事，她否認說：「冇啲咁嘅事。佢哋（同事）之前有諗唔做，不過佢哋好有義氣，因為我好多工作，佢哋等我做完先走。（跟你一齊過檔？）唔知佢哋有冇見工，唔到我話事。」她透露現正與不同公司接洽，自己亦為此而緊張得徹夜難眠。問到她有否徵詢哥哥謝霆鋒意見？她表示：「佢都冇乜意見。家人唔想負太多責任，如果有咩事我會賴佢。」
而丁子高則透露與老婆楊千嬅會互寫情信，更大讚千嬅有詩意，要再三咀嚼才能了解底蘊。問他有否保留舊情人的情書？他說：「未結婚之前會keep，依家丟咗。」另外，他大爆囝囝時常作弄千嬅，不肯飲她餵的奶，但當自己及陪月餵他時卻飲得很快。他又透露千嬅現在一星期做六天運動，積極操弗待復出。
楊汀叮聞整容不悅
而剛簽約新公司的楊汀叮則透露現正拍攝由文恩澄執導的微電影，對於文恩澄的前男友香蕉樂部DJ杜浚斌被拍得攬女上酒店，問對方有否找她訴苦？她稱：「其實我都係因為呢套電影先識佢，冇見佢唔開心。」另外，對於有傳她整容一事，她坦言：「係女仔聽到都唔開心，不過如果連少少壓力都承受唔到，就好難喺娛樂圈生存。（有冇打botox？）如果將來工作有需要，都唔介意。」
文：名人組