劉欣宜人狗輪住啜 男友嗒糖
o靚模「E Cup Baby」劉欣宜事業未見突破，近年寄情拍拖，有傳她與男友趕做龍年夫婦，日前二人帶同愛犬齊齊在旺角出巡，期間E Cup Baby錫完愛犬又錫男友，又孖住睇BB衫，莫非二人「造人」成功，買BB衫自用？
三年前憑34E逼爆身材出道的「E Cup Baby」劉欣宜近年逐漸退出o靚模界，久久未有出寫真集的她早已被音樂總監陳子敏私有化，雖然二人僅拍拖一年多，但早已傳出二人趕於今年做龍年夫婦！
街頭互餵小食
日前這對煙韌情侶高調晒恩愛，帶同迷你玩具貴婦狗遊旺角，享受三口子家庭樂。「E Cup Baby」乘電梯時不顧危險，未有捉緊扶手之餘，雙手更不斷抱起愛犬錫錫，而男友兩手直頭攬人又搞狗，認真牙煙！錫完狗仔的「E Cup Baby」轉個頭又喪咀男友，男友不但未有介意，更全程冧樣回吻。手拖手的二人行到小食店時，公然你一啖我一啖互餵對方，十足十連體嬰！
未有否認造人
他們後來在賣BB衫攤檔駐足，不斷手指指評論，更與檔主有傾有講，似乎對BB衫相當有興趣！事後記者致電「E Cup Baby」，問她是否為「造人」大計作準備？她未有即時否認，只說：「行過見到得意咪睇吓！」
文：專案組