鄺美雲認戀恒地高層 蜜運兩月
在娛樂圈有富婆之稱的鄺美雲（Cally），昨日被本報踢爆與恒地營業部總經理林達民（Thomas）蜜運當中，昨日Cally透過電台訪問坦白承認戀情，自爆與男友林達民已拍拖兩個月，指對方狀況是「Single」，亦接受對方已有小朋友。
Cally多年來感情生活一直空白，近日春風滿臉的她經本報踢爆原來正沐浴愛河中，對於戀情被揭一事，昨日Cally接受電台節目「一圈圈」電話訪問，首度開腔認戀情，而主持人梁泰來亦透露Cally男友名為林達民（Thomas），現年53歲，是恒基地產高層，被喻為四叔（李兆基）的愛將。對於男友婚姻狀況，Cally在訪問中表示：「佢係已婚，但係中間漏咗個字係『已離婚』。」她稱與Thomas拍拖不久，大概兩個月，拍拖是開心事，從沒想過要隱瞞。
不乏追求者
另Cally大讚男友有智慧又聰明，大家相處默契很重要，與他一起感受到開心。至於男方如何贏得其芳心？她謂：「每次見面都會傾偈，佢好有工作熱誠，呢樣好重要，本身自己鍾意工作，忙碌就係營養，呢個人好有營養，好運動型，同埋溝通都好緊要。」Cally坦言過去不乏追求者，她謂：「有啲人根本冇入場券，如果你結咗婚嚟追我，你諗都唔好諗啦，係Single先可以排隊。」
唔急於結婚
說到Thomas雖已離婚，但可介意他有下一代？Cally表示：「最好添，係好事，我好鍾意小朋友，唔會Jealous（妒忌）！」問可有想過結婚？Cally即笑言：「啱啱拍拖唔使咁快呀！」而Cally亦被男友影響開始做運動，有朋友指她瘦了一點，漸見成績。
文：音樂組