陳庭欣開中門搶贏岑麗香
前港姐陳庭欣（Toby）昨日中門大開兼佩戴幾百萬珠寶示人，揮低同場的「宅男女神」岑麗香，Toby賣口乖多謝公司給予機會自己搶鏡，而身上的珠寶價值等同一層樓，她揚言有錢寧願買磚頭保值，果然食腦。
無綫昨日為周六舉行的《善心滿載仁愛堂》舉行記者會，擔任模特兒的Toby、岑麗香及朱晨麗分別戴上百萬珠寶配性感晚裝出場。Deep V上陣的Toby無懼緋聞男友翟威廉呷醋，中門大開露出3吋事業線，揮低穿Tube Dress的岑麗香，成為全場焦點。
太性感怕嚇親長輩
Toby被讚中門大開搶鏡時，她笑說：「多謝公司囉，原本有條Tube Dress畀我揀，不過太鬆喇，我擔心走光，所以打直係咁黐（膠紙），（戴幾百萬珠寶？）頭先我哋講笑話想趁混亂走先，點知畀你哋捉住做訪問！（活動當晚都咁性感？）唔會喇，我做司儀，驚嚇親啲公公婆婆。」至於岑麗香表示戴上珠寶後感覺自己高貴兼優雅，如果有積蓄都想買一套送給媽咪，認真孝順！Toby聞言即謂：「等如成層樓喎，有錢都買樓先啦！」
江若琳崇尚自然美
同場的陳松伶今次返港灌發燒碟之餘不忘行善，活動當晚將參與表演，她透露最近做「跟得夫人」，陪丈夫到上海拍劇：「我去咗成個月，幫佢settle down之後，再向佢攞假返嚟錄音，還自己一個心願，唱片會唱番八、九十年代別人的歌。（自己嗰啲呢？）以前唱片公司陷入清盤糾紛，好難攞到版權。」而江若琳談到「美容毒針事件」即謂：「女仔要保護自己，點會話40歲打完支針就變番25歲？一定有風險嘅，我同身邊啲朋友都崇尚自然美。」
文：影視組