伍靜麗棄法從模一鼓作氣
來自馬來西亞、擁有高挑身形的伍靜麗（Angie Ng），曾被挑選於倫敦時裝周行騷，實力毋庸置疑。對模界滿腔熱誠的她，更甘心放棄前途一片光明的律師生涯。來港短短兩年，她已嶄露頭角，被著名設計師鄧達智點名讚揚，更被喻為名模馬詩慧接班人，前途無可限量！
馬來西亞華僑伍靜麗（Angie Ng）對你來說可能是一個陌生的名字，但當你看到她高挑的身形、富亞洲色彩的鳳眼，配合可愛又潮爆的bob頭，你或許會對她有一點印象。夾着名模Ana R.及Jessica C.師妹的銜頭在港出道的她，別以為她是模界初哥，原來她入行已有七年之久，足迹更踏遍大江南北，曾參與倫敦時裝周，實力毋庸置疑。她不但走秀經驗豐富，個人修養及內涵更不容小覷！修讀法律出身的她，絕對是內外兼備，相對香港時下只獨沽一味騷身材的o靚模，實在是望塵莫及。
大家必定十分好奇，為何堂堂一個法律系學生，會甘願冒險去投身風險極高、壽命不一定長久的模界？難道她非常貪慕虛榮？難道她家境富裕、賺錢只為買花戴？單純的Angie聳聳肩，笑着說：「其實我喺英國讀書嗰陣冇諗咁多，朋友話我生得咁高，不斷鼓勵我叫我試吓做模特兒。我又覺得自己既然都飛到咁遠，唔試吓會後悔。所以就鼓起勇氣，逐間逐間模特兒公司自薦同面試，正式踏上我嘅part time模特兒之路。」
幾辛苦都值得
話說得輕鬆，但要成為走上國際天橋、受全場注目的模特兒，總吃過不少苦頭，有不少辛酸史。她為了練習行貓步，連續數月放學後在鏡房練習「交叉腳full turn」，風雨不改。即使高跟鞋夾得腳掌也變形，她亦從沒想過放棄，只懂默默耕耘，慢慢由只可轉四分一，進化成二分一，最終輕鬆完成full turn。但做模特兒不單單只局限於行貓步，就連廣告、代言人等亦要擔任，更要在無論多惡劣的環境下，仍要將最美一面展示，鬥志少一點都不行。「我試過夜晚喺雪山拍短片，所有工作人員都着羽絨，我就着短裙、open toe高踭鞋。一邊拍已經不斷打冷震、流鼻水，拍完之後腳趾簡直好似要甩咁！不過呢個係一個好大型嘅job，我被選中已經好開心，無論幾辛苦都係值得o架！」
姊姊影響深遠
Angie有如此刻苦耐勞的性格，她坦言與自己的成長背景有不少關係。「我爸爸好早就過咗身，所以由媽媽獨力支撐頭家。加上我係屋企嘅孻女，哥哥、姐姐都大我好多年，佢哋出晒去做嘢，屋企就得番我同媽媽。但係因為媽媽好忙，所以我成日都想做到最叻，咁樣就會畀媽媽讚。所以我讀書咁叻，唔多唔少都係因為咁。」
除此之外，比她大九年的姐姐，對Angie來說更是影響深遠。「由細到大，我都好仰慕我家姐，佢做乜我都會跟住做，好似佢減肥，我又會跟住減。」非常湊巧，她的姊姊於娛樂圈發展，更當選馬來西亞小姐，相信這對Angie選擇入行也有不少影響。「姐姐成日都提醒我要小心，因為就算佢選馬來西亞小姐，冠軍都係內定嘅，唔係公平競爭。不過我覺得我做模特兒有少少唔一樣，我做咁耐，都未試過有人對我好差，又或者叫我去飯局，所以我相信模界都係靠實力嘅。」
鄧達智點名讚
不得不提，Angie曾被香港著名設計師鄧達智點名讚揚她有個人風格，看好她成為新一代名模。我們從她行天橋的實力及功架，實在覺得她與名模馬詩慧（Janet）有幾分相似！對此，Angie謙稱不敢當，及後笑言：「我唔想做人哋嘅翻版，我想做番自己。不過我當然好羨慕Janet事業咁成功，依家又有自己嘅家庭同仔女。我覺得佢嘅人生好圓滿！」目前與圈外男友拍拖一年多的她，坦言感情生活十分美滿，但暫時尚未有結婚念頭，因她仍想趁年輕為事業衝刺。在組織幸福家庭前，要成為獨當一面的超模！
Profile
姓名：伍靜麗（Angie Ng）
身高：1.80米
三圍：33-25-34
國籍：馬來西亞
出生日期：2月24日
學歷：Universty of Reading法律系畢業（英國）
採訪：龔凱欣
攝影：秦健輝
場地：Indochine