田蕊妮:君如係我兩公婆貴人

十六歲已入行的田蕊妮,曾年少氣盛寸爆電視台高層,她直言感激吳君如,畀機會佢拍戲做電台,近年的她笑言樂做大娛樂家,唔介意地位,帶歡樂畀觀眾至重要。

以前喺亞視尤其《縱橫四海》之後,個心好紅,以為自己好叻,懷才不遇,當年監製陳寶華喺無綫過嚟亞視做高層要見我,我仲好抵打,拎住杯凍檸茶,著住件背心,好HEA好寸咁上去見佢,第一句就問佢:「做咩要見我?我都諗住走嘞喎!呢度冇機會,又唔重視我!」佢一聽完再睇睇我當時人工係萬六蚊,就講咗句:「唔怪得知你咁想走啦!冇機會,人工又唔係高,我係你會燒咗間電視台囉!」當時我忍唔住爆笑!仲話:「係喎!點解我唔燒咗間電視台!」因為呢次,大家夠真,佢加咗我一倍人工,畀好多機會我,仲做咗朋友!

資深無人鬧

離開亞視後,老公照顧得我好好,我又有積蓄,晚晚同君如鄒凱光開咪,直到無綫搵我拍劇,先發現我啲passion走晒出嚟,覺得嗰幾廿年冇白活,好有安全感,哈哈!因為之前做電台真係好大壓力,原來我最喜歡係做戲!入返電視台拍戲,令我視野宏觀咗,初時人人都以為我資歷深,拍戲時冇人夠膽challenge我,直至同監製王心慰拍《Only You》。有日佢叫我返公司睇片,從來冇試過咁大件事,原來佢係好意話我,話個樣已經夠硬淨,做戲時唔好做得咁惡!而劉松仁我都好多謝o架,因為佢帶我去領略做戲另一個層次角度,珍姐(曾勵珍)、梁家樹同樂小姐(樂易玲)都對我好好,畀好多機會我。

另一個要多謝係吳君如,係我兩公婆嘅貴人,帶咗我哋去另外一個領域,如果冇佢,老公冇機會做電台,我冇機會拍《金雞》兼女配角提名,起碼君如冇藐我冇嫌我,真係要好有胸襟,畀信心同睇得起我先做到!以前拍戲係為獎同認同,而家反而覺得拍戲好有意義,可以陪住觀眾食飯,帶歡樂畀佢哋,做個大娛樂家,係一個褔報。

口述:田蕊妮

筆錄:專案組