鄭少秋死頂：冇錢照坐的士
鄭少秋原名黃可忠，年幼時過繼給鄭姓父親，名為鄭創世，後來學話劇一度改名鄭偉雄，長大後入行拍粵語片當男主角，惟粵語片式微，為生計而到山寨廠做織衫工人。但人人都知他是明星，生性豁達的他一度亦看不破明星與現實的生活矛盾，明知無錢都要坐的士返工，「打腫面充闊佬」。
以前年代好鍾意「過繼」，我從來冇過問點解，怕我養唔大或家境問題啩？後來我都有見番生父黃仁傑，大家都冇嘢喎，我亦冇嬲過，可能性格開朗啦！一直都冇影響到成長嘅心理。直至16歲嗰年，我讀到中四冇心機繼續讀書，掛住做戲，咁啱有電影公司招生，我哋成班傻佬咪去上堂，學完後乜嘢收成都冇，唯一叫我哋做臨記！
不過，後來我都簽咗「堅成影片公司」做粵語片演員，第一部拍陳寶珠，套戲叫《黑煞星》，我以為自己係男主角，實情寶珠係男、女角都撈晒（寶珠反串演男角）。其實，我都係一個男主角，都好好彩！後來拍咗幾部，粵語片式微開始冇乜人睇，我就一直坐響屋企冇嘢做，好慘。當年廿幾歲咋，我心諗：「唔通前途就係咁？」為咗維生都要學番一門技術，以前喺訓練班識得一個製衣加工嘅同學，仲開山寨廠接啲織線衫返嚟做，將啲織衫夾口位縫埋佢，我咪學囉，試過落手落腳做o架！
開山寨廠 蝕到入肉
當年做咗明星都要做男工，外間啲人又識我，又知我做男主角，所以出街冇錢都要坐的士，唔敢坐巴士，好似好有型，其實死頂咋！做明星又要買衫喎，唉……唔理嘞！有得搵（錢）乜都唔理，做男工咪做男工，日頭唔露面，惟有通宵匿埋嚟做，每晚返廠練習學織線衫，學識咗就投資買架機，阿媽仲支持我，畀錢我買台機返嚟做，於是我就接貨。唉，點知新機器『起棱起角』（棱角太利）成日斷線，最後未能如期交貨，畀人追貨要賠錢，我個拍檔激氣得滯講笑話：「整個菠蘿（炸彈）佢哋歎吓！」嚇到我阿媽以為我同啲咁激嘅人一齊好危險，叫我唔好再做，最後我個山寨廠摺埋冇做，蝕幾百蚊，當年好多錢o架啦！