錢嘉樂認做老竇：衰喺我身上！

錢嘉樂昨日出席劇集宣傳活動，心情大靚兼風騷的他雖然對未來老婆湯盈盈懷孕一事避談，但仍難掩喜悅，期間他攬着劇中八歲的兒子謂：「我係做老竇嘅，喺個劇嗰度呀！」玩遊戲時，嘉樂又甚照顧小朋友，十足慈父。而汪明荃笑言嘉樂宣布婚訊後頓顯穩重，阿姐謂：「差唔多啦！事業穩定，再拖落去先唔正常，會散o架！」她又讚嘉樂是有責任的男人。

嘉樂甫見記者即接受大家祝賀，問有否告知母親喜事時，他謂：「講咗嘞！（佢話未知?）佢保護我啫！佢一早就知，（有孫抱喎！）遲啲先講，時機啱會同大家講，宣布結婚先，依家暫定十一月，要搵個高人擇日，唔會撞台慶，（遲啲見肚喎?）遲啲先講。」

腹部微隆的盈盈埋位前她只穿矮踭鞋。

盈盈要由專人服侍換上四吋高踭鞋。

願代拍跣低戲

說到盈盈之後會拍一場跣低戲份，嘉樂笑言做慣武師的自己代她。之後盈盈要到東莞拍外景，嘉樂表示不知情，問是否擔心會跟埋去，他表示：「OK嘅！安仔（郭晉安）等人會照顧佢。」記者又問他為何這麼急時，嘉樂開心笑謂：「衰喺我身上，我希望今年，（等唔切？）我睇完醫院份報告驚等唔切呀！」嘉樂又透露由於朋友、同事甚多，故婚宴最少五十圍以上。問嘉樂怕否到時她會被姊妹報仇時，他居然謂：「佢就係罪有應得o架嘞，不過班姊妹應該對佢好好。」嘉樂又指度蜜月遲些再諗，說到時可能「三人行」，他笑言:「唔係咁快嘛！遲啲先講啦！自己冇得講大話，亦唔想講，畀啲空間啦！」

着四吋高踭鞋

至於懷有身孕的湯盈盈昨日為劇集拍外景，為穩陣起見埋位前她只穿矮踭鞋，到正式拍攝時才由專人服侍換上四吋高踭鞋，但中途見攰盈盈都換了，她說：「對高踭鞋本身都難着嘅，同埋呢度多梯級，其實係驚其他人擔心我，所以先着平底鞋。」問到她前日探望剛生B的文頌嫻時會否已緊張，她說：「未有咁快！」

文：影視組