徐濠縈：我認呃飯食
徐濠縈在演藝界打滾了八年，卻不享受，她自認是入錯行的最佳例子之餘，也贊同娛樂圈是搵快錢的最佳途徑，使慣食慣的她惟有抱住「呃」飯食心態度日，更望天祈求有日脫離苦海，終於陳奕迅圓了她的心願，令她能結束演藝生藝，有得靠「仔」養。
我93年入行，嗰時啱啱讀完秘書課程，期間被電影公司睇中，叫我去casting，跟住開始拍戲，當年我只得19歲。其實我本身對演戲係無興趣，完全係一舊雲，我絕對唔係實力派，個樣又唔係靚到可以做偶像派，我係入錯行好例子，絕對係呃飯食。
唔求有代表作
當時電影業市道唔好，之後同TVB簽約，拍吓電視劇，做吓主持，仲要拍過幾套古裝劇，真係拍戲拍到癲o架！雖然唔鍾意拍劇，但娛樂圈無疑係一個搵快錢嘅地方，尤其是對我呢啲咁鍾意買鞋、買衫嘅人嚟講，我諗唔到做演藝工作之外，有咩工作可以維持到呢個生活質素，租屋又要買衫，仲要得閒去吓旅行，所以明知自己唔鍾意都努力返工，但唔代表我努力去鑽研演藝。我對自己喺娛樂圈唔會有乜要求，冇諗過有乜成就，冇話要做咩女主角或者有代表作，完全係過日神，當打份工。
出動私伙名牌
我向來都好鍾意時裝，拍戲時都會出動私伙衫，仲要着名牌衫去拍劇。嗰時拍戲識落好多朋友，不過都唔易捱，點解我用個捱字呢？因為我根本唔鍾意拍戲，如果你同Eason講唱歌，佢就唔會用個捱字，因為佢真係好鍾意唱歌，你從來唔會聽到佢話好辛苦。
但我就會呻拍戲辛苦，後來同TVB個約差唔多滿，Eason叫我唔好做，期間再諗有乜搞作，我仲記得自己最後一套劇係同林峯同楊千嬅合作嘅《美味情緣》，當時我27歲，咁就了結咗我嘅演藝生涯。
口述：徐濠縈
筆錄：名人組