師兄金剛帶母開餐濕平
與樂壇天后容祖兒蜜運中的劉浩龍，以及緋聞無數的金剛，兩男前晚不約而同撇甩另一半，伴實媽媽做孝順仔，劉浩龍請阿媽食日本菜，金剛則為由台灣來的媽媽做伴遊。
劉浩龍（師兄）雖然公開承認和樂壇天后容祖兒拍拖，但兩人因為各有各忙，甚少有機會享受拍拖生活，前晚約九時，師兄的助手率先步出日式串燒店，開着師兄停泊在路邊的座駕，未幾，早前拍劇受傷的師兄，搭住媽媽膊頭一拐一拐地步出，兩母子更邊行邊傾，相當溫馨。
一行三人緩緩地行近座駕，有傷在身的師兄未能自行駕駛，將開車重任交給助手負責，只見他狀甚痛苦地慢慢移身坐入司機位旁邊。師兄早前和祖兒撻着拍拖時亦曾幫襯相隔數條街的另一家串燒店，對串燒情有獨鍾的他，前晚未有女友在身邊，惟有和媽媽及助手開餐。
銅鑼灣逛名店
另外，由台灣來港發展的金剛，最近其母親與胞妹來港探望他，金剛前日亦做其孝順仔，帶母親，妹妹及妹夫前往銅鑼灣掃貨，全程如同男伴遊般帶他們逛名店及穿梭商場，一行人期間於商場內食雪糕攤抖一輪又再往血拼，滿載而歸後金剛再與家人往歎中菜。事後聯絡金剛，問到母親來港有否帶她與緋聞女友蔡慧欣會面見家長，他笑說：「緋聞嚟啫，假嘅，媽咪唔會問我感情事，更加唔會催我拍拖，因為阿妹十二月都結婚喇，佢唔得閒理我。」
文、攝：追蹤組