湯洛雯明踩郭羨妮不值當港姐
郭羨妮（Sonija）自5月產女後，昨首度在港復工，卻被身為後輩的候選港姐湯洛雯「未登港姐位，先置插人刀」，直指她是最不值得當選冠軍的港姐，難得貴為四料港姐的Sonija不怪師妹贈「慶」，更聲言看好對方！
「是非港姐」湯洛雯昨與其餘9位候選佳麗到荃灣出席拉票活動，每人上台發表1分鐘講話，再接受「巨聲幫」及現場大專生提問，湯洛雯被大專生指名問到：「歷屆邊個港姐唔值得攞冠軍？」她考慮了整整一分鐘後說：「郭羨妮！」衝口而出後才知衰死兜說：「因為佢靚，有明星風範，應該去做電影明星。」司儀崔建邦追問：「即係佢唔應該選港姐？」湯洛雯卻充耳不聞，索性不回答。
「補飛」唔認冇智慧
湯洛雯事後受訪時，也自知說話太盡，連忙「補飛」解釋：「我到依家都仲驚緊，好擔心，問題好難答，其實個個港姐都實至名歸，好難揀，揀郭羨妮因為我鍾意，佢好有氣質。我都唔係答得好差啫，但都唔係答得好好。（你係咪冇智慧？）唔係，係我唔想敷衍答。」至於Sonija對於遭師妹點名指不值得封后，她大方說：「湯洛雯係今屆我睇好嘅其中一位佳麗，佢OK呀！（唔嬲佢咁講你？）有乜好嬲，我係大姐姐。」
向來多是非的湯洛雯，昨日更遭曾明俐及黃心穎連環放箭，曾明俐直指湯洛雯「香港長大，style最似香港」係港女，黃心穎甫聽到「巨聲幫」問「邊位佳麗有背景？」即望實湯洛雯說：「乜唔係好多人知啦咩？咪企咗喺度囉！」雖然如此，但湯洛雯最終仍與張名雅得票相同，被現場觀眾選為「現場最受歡迎佳麗」。
放聲氣母女檔搵銀
此外，Sonija昨日到屯門出席《卓爾愛家會5周年》活動，她透露囡囡兩個多月大「幾好湊」，但暫時不會接出埠job：「因為好掛住個女！但我唔介意同個女一齊拍廣告。（再生？）我都想追番個仔，湊成一仔一女。」對於舊愛溫兆倫早前捲入感情及錢財糾紛，Sonija說：「唔回應，冇聯絡好耐。（有冇呃你錢？）冇。」
文：影視組
港姐大起底
爆料熱線：3600 1022
爆料傳真：3600 1000
爆料email： entertainment@opg.com.hk