徐濠縈冷戰Eason：預o左玩完
時裝達人徐濠縈（阿徐）天生一副cool爆樣，一舉一動均受大眾注目，大花筒愛花錢愛夜蒲，甚至帶女逃學歐遊，受盡批評的她不怨不恨，只有默默接受。阿徐在本報一連五天專訪真情剖白，訴說愛恨歲月及時裝經，更大爆與老公陳奕迅（Eason）的「七年之癢」，曾一度分房而睡，婚姻備受考驗！"相對不發一言 似是你共我有了默契 永不要幼稚的罵戰 但表情彼此表情悄悄地暗示這是冷戰 錄自王菲《冷戰》"
同Eason未結婚之前我已經冇做娛樂圈，有兩、三年都游手好閒吃喝玩樂，嗰時我冇收入，又同Eason一齊住，佢畀家用我都好正常，有乜問題？又係個男人開口叫我唔好做，同埋佢有能力養到我，點解唔可以畀家用我使，我覺得自己使得好光明正大，嗰個係我男友，都係我半個老公。
感情轉淡冇安全感
但當你同一個人耐咗就唔會有激情，可能連愛情都冇，只得感情，如果我話冇嗌過交你都唔會信！好坦白講，我哋曾經有「七年之癢」，我成日同人講相處到五年、七年嘅時候好易有暗湧，你捱得過就捱得過，捱唔到就bye bye！嗰段期間我哋有過好大問題，係一個轉捩點，有諗過分開。為乜？可能佢當時太紅太忙，冇乜時間陪我，但未至於唔理我，佢有時做完嘢未必即時返屋企，會同同事或朋友有下場，我又同自己朋友去夜蒲，就算旅行都未必一齊去，感情愈嚟愈轉淡，關係好疏離，各有各咁，唔係好關第三者事，加上當時我冇嘢做，靠佢養，好冇安全感，我同自己講，算啦！唔可以再係咁落去，我要搵嘢做，搵條出路畀自己，都預咗可能會分手，既然係咁就要鋪排過我嘅新生活，嗰段暗湧時間真係好難過，呢一世都唔會唔記得，03至04年係大家最有問題嘅一年。
朋友緊張從中調解
我哋冷戰咗幾個月，呢段時間只有相熟朋友知道，佢哋不停勸我兩個，問大家一齊咁耐做乜分開，我哋又唔可以畀外界知，因為分開係好大件事，要深思熟慮，唔可以今日話分手、聽日又喺番埋一齊，到後日又話再分手，唔可以咁兒戲。冷戰期間我搬唔到出去，惟有一個瞓廳、一個瞓房，連身邊朋友都唔知，我嗰時都諗緊呢段感情會冇，身邊好友都冇放棄，得閒兇吓佢、得閒又兇吓我，話咁難得搵到個咁明白同了解你，又畀你去玩，唔似有啲男人咁專制，管住你。講真，Eason真係好畀自由我，仲好關心同支持我，我有諗如果分開咗會唔會搵得番好似佢咁好嘅男人，最重要係大家互相明白，卒之有日諗通咗就搬番同一間房。
口述：徐濠縈 筆錄：名人組