農夫演唱會難產 耍冧退票

農夫原定下月十一日假九展舉行的「雙囍臨門」演唱會突然「難產」，昨日二人出席活動時沉重宣布：「我哋個演唱會決定取消。」二人向買了飛的朋友致歉，並囑咐留意退票安排。

據知農夫的演唱會至今銷量只得五成，對於演唱會取消原因，農夫指是唱片公司和經理人公司的磨合上出現了問題，亦有些「繁文縟節」未解決。成員陸永說：「今次個演唱會好多嘢係我哋落手落腳去做，好希望遲啲有機會自己搞。呢件事唔可以怪公司，我哋淨係想做好場騷。」C君亦在微博上交代事件，向歌迷道歉。

Jade恨老公唱情歌

農夫經理人DJ Tommy回應，指唱片公司高層認為售票情況不理想而cut騷，曾與對方爭執，但否認「吵大鑊」，並有信心會找到其他人投資。至於唱片公司老闆何哲圖對取消個唱，多番強調：「長時間籌備好啲。」他承認票房普通，問到何時會再舉行？他表示未有日期。

同農夫一齊出席活動的還有關心妍（Jade）與吳雨霏（Kary）等歌手，快將生日的Jade笑言恨擅於製造驚喜的老公唱情歌冧自己。而Kary被問到奧運會否看網球時，伊人甜蜜傻笑：「OK啦！」

文：音樂組